ئەمیندارێتی گشتی ئەنجوومەنی وەزیرانی عێراق نووسراوێکی ئاڕاستەی بەڕێوەبەرایەتییەکانى بەغداى پایتەخت کردووە و تێیدا هاتووە، دەوامی سەرجەم بەڕێوەبەرایەتییەکان لە کاتژمێر حەوتی بەیانی دەستپێدەکات تاوەکو کاتژمێر پێنجی ئێوارە و فەرمانبەرانیش بەسەر چوار شەفت دا دابەش دەکرێن.
لە نووسراوەکە ئاماژە بەوەش کراوە، لیژنە تایبەتمەندەکان سەرپشک دەکرێن بە پێشکەش کردنی نوسراوێکی گونجاو لەلایەنی یاساییەوە لە بارەی کاتی دەستپێکردن و کۆتایی هاتنی کاتژمێرەکانی کارکردن لە وەزارەتەکان و لایەنە ناپەیوەستەکانی وەزارەت لە پارێزگای بەغدا.
هۆکارى ئەم بڕیارە بۆ ئەوەیە ئەو قەرەباڵغى و پاڵەپەستۆ و فشارەى لەسەر فەرمانگە و بەڕێوەبەرایەتیەکانى دەوڵەت و شەقامەکان هەیە لە بەغداى پایتەخت، کە لە یەک کات دا ئەوە درووست دەبێت، بۆیە بە ئامانجى کەم کردنەوەى ئەو بارگرانى و فشارە لەسەر فەرمانبەران و هاوڵاتیان و شەقامەکان ئەو بڕیارە دەرچووە.
رێنماییەکانی
کاتی دەوامی فەرمانگا و بەڕێوەبەرایەتییەکان بەم شێوەیە دەبن:
یەکەم:
دەوامی فەرمی لە دامەزراوە حکومییەکان لە کاتژمێر ٧:٠٠ی بەیانی دەست پێدەکات تاوەکو
کاتژمێر ٥:٠٠ ی ئێوارە و فەرمانبەرانیش دابەش دەکرێن بەسەر چوار شەفتی جیاواز.
دووەم:
بە کارخستنەوەی کاتژمێری زیادەی کارکردن لەو کاتەی پێویست بێت کە فەرمانبەر لەسەر
کارەکەی بەردەوام بێت لە دوای تەواو بوونی دەوامی فەرمی خۆی.
سێیەم:
رێکخستنی دەوامی فەرمی دامەزراوەکان بە شێوەیەک لە حەفتەیەک دا شەش رۆژی دەوام بکرێت
و دەوامی فەرمانبەریش لە پێنج رۆژ لە هەفتەیەکدا کەمتر نەبێت، واتا فەرمانبەر
دەتوانێت جگە لە رۆژانى هەینى رۆژێکى تریش دەوام نەکات.
چوارەم:
جێبەجێ کردنی ئەو رێنماییانە لە شاری بەغدا و ئەو پارێزگایانەی ئارەزوو دەکەن بەو
شێوەیە دەوام بکەن بۆ ماوەی سێ مانگ بە شێوەی تاقیکاری (تێست) لە دوای تەواو بوونی
ئەو وادەیە دووبارە بڕیاری نوێی لەسەر دەدرێت.