سەرۆکوەزیرانی پێشووتری عێراق بە دیجیتاڵ میدیای ئێن ئاڕ تی راگەیاند، نابێت بەهۆی کێشە و ململانێی سیاسییەوە هەڵبژاردنی هەرێم دوابکەوێت و ئەو حکومەتەی ئێستا لە هەرێم هەیە ماوەبەسەرچوو و نایاساییە.
حەیدەر عەبادی سەرۆکوەزیرانی پێشووتری عێراق لەگەڵ شاسوار عەبدولواحید سەرۆکی فڕاکسیۆنی نەوەی نوێ کۆبووەوە و ئاماژەی بەوەدا، دەبێت کاتێک بۆ ئەنجامدانی هەڵبژاردنی پەرلەمانی هەرێم دیاریبکرێت و لە کاتی خۆیدا بەڕێوەبچێت.
ئاماژەی بەوەشکرد، نابێت بەهۆی
کێشە و ململانێی سیاسییەوە هەڵبژاردن دوا بکەوێت، چونکە ئەو حکومەتەی ئێستا لە هەرێم
هەیە ماوەبەسەرچوو و نایاساییە.
لەبارەی کێشەکانی نێوان بەغدا
و هەرێمەوە باسی لەوەکرد، پرۆژەیاسایی بودجە کە بەشێکی گەورەی گرژییەکانی نێوان بەغدا
و هەرێم بوو تێپەڕێندرا، بۆیە دەبێت رێککەوتن بکەن و کێشەکانیان چارەسەر بکەن.
هاوکات، شاسوار عەبدولواحید
سەرۆکی فڕاکسیۆنی نەوەی نوێ ئاماژەی بەوەکرد،
دەیانەوێت پەیوەندییەکانیان لەگەڵ هێزە سیاسییەکانی بەغدا ی توند و تۆڵ بێت.
ئەمە لەکاتێکدایە، بەمەبەستی
بەشداریکردن لە حەوتەمین دیداری سلێمانی کە دوو رۆژ دەخایەنێت، حەیدەر عەبادی سەرۆک
وەزیرانی پێشووتری عێراق گەیشتە شاری سلێمانی و دواتر سەردانی شاسوار عەبدولواحید
سەرۆکی جوڵانەوەی نەوەی نوێی کرد.
ئـ - کـ