لەناوەڕاستی مانگی ئادار هەرسێ سەرۆکایەتی تورکیا لەگەڵ نوێنەرانی فینلاند و سوید کۆدەبنەوە لەسەر پرسی بە ئەندامبوونی ئەو دوو وڵاتە لە هاوپەیمانی باکوری ئەتڵەسی (ناتۆ).
یانس ستۆڵتنبێرگ ئەمینداری گشتی ناتۆ رایگەیاند، هەفتەی رابردوو سەردانی تورکیایان کردووە و لەگەڵ سەرۆکایەتی ئەو وڵاتە کۆبوونەتەوە و بڕیاردراوە کۆبوونەوەیەکی سێ قۆڵی لە نێوان تورکیا و فینلاند و سوید لە ناوەڕاستی مانگی ئادار بەرێوەبچێت.
ئەمینداری گشتی ناتۆ وتیشی، "کۆبوونەوەی ئەو سێ لایەنە لەسەر پرسی بە
ئەندامبوونی سوید و فینلاندیە لە هاوپەیمانی ناتۆ."
ئاماژەی بەوەشدا، پرسی بە ئەندامبوونی فینلاند و سوید لە هاوپەیمانێتی ناتۆ
لە دوای هەڵگیرسانی جەنگی نێوان روسیا و ئۆکرانیا هاتە پێش و لەگەڵ سەرۆکایەتی
تورکیا رێککەوتن بۆ گفتوگۆکردن لەبارەی ئەو پرسە.
ئەوەشی خستەڕوو، پێشبینییەکانیان ئەرێنییە لەسەر پرسی بە ئەندامبوونی هەردوو
وڵات و قایلبوونی سەرۆکایەتی تورکیا، هەردوو وڵات کاتی ئەوەیان هاتووە پرۆتۆکۆڵی ئەندامبوونیان
جێبەجێ بکەن.
باسی لەوەشکرد، هەفتەی داهاتوو پەرلەمانی هەنگاریا پرۆسەی پەسەندکردنی ئەندامبوونی
سوید و فینلاند لە هاوپەیمانی باکوری ئەتلەسی ناسراو بە ناتۆ بەڕێوەدەچیت و وتیشی،
"ئامانجام ئەوەیە پرۆسەکە بە خێرایی جێبەجێبکرێت."