AM:08:49:14/02/2023
3060 جار خوێندراوەتەوە
ژمارەی گیانلەدەستدان بەهۆی ئەو بومەلەرزەیەی لە ٦ـی ئەم مانگەدا لە ناوچە سنورییەکانی تورکیا و سوریا روویدا ٣٧ هەزار کەسی تێپەڕاند و رێکخراوە جیهانییە مرۆییەکانیش بەردەوامن لە گەیاندنی هاوکارییەکانیان بە زیانلێکەوتووان.
بەڕێوەبەرایەتی رووبەڕووبوونەوەی کارەسات و فریاگوزاری تورکیا رایگەیاند، تاوەکو ئێستا ٣١ هەزار و ٦٤٣ کەس بەهۆی بومەلەرزەکەی ٦ـی مانگەوە گیانیانلەدەستداوە. بەپێی لێدوانی رێکخراوی فریاگوزاری کڵاوی سپیش لە سوریا سێ هەزار و ٧٠٠ کەس گیانیان لەدەستداوە ژمارەی بریندارەکانیش ١٤ هەزار و ٧٥٠ کەسی تێپەڕاندووە.
لەبارەی هاوکارییەکانیشەوە
وەزارەتی دەرەوەی تورکیا ئاشکرایکرد، نۆ هەزار و ٢٤٧ کەسی بیانی بەشدارن لە
کارکردن بۆ رزگارکردنی ئەو کەسانەی لەژێر دار و پەردووی باڵەخانەکاندا ماونەتەوە و
١٠٠ وڵاتیش هاوکارییان پێشکەش بە تورکیا کردووە و لە ٨٠ وڵاتی جیاوازەوە تیمی هاوکارییان
بۆ نێردراوە.
لایخۆشییەوە، ئەنتۆنیۆ
گۆتێرێس، سکرتێری گشتی نەتەوە یەکگرتووەکان ئاماژەی بەوەدا، بەشار ئەسەد سەرۆکی
سوریا رەزامەندی دەربڕیوە بۆ کردنەوەی دوو دەروازەی سنووری دیکە لە نێوان تورکیا و
باکوری رۆژئاوای سوریا بۆ ماوەی سێ مانگ، بۆ گەیاندنی هاوکاری مرۆیی بەو کەسانەی کە
بەهۆی بوومەلەرزەکەوە زیانیان بەرکەوتووە.
لە ٦ـی شوباتی ئەمساڵدا
بومولەرزەیەک بە گوڕی ٧.٨ ناوچە سنوورییەکانی نێوان تورکیا و سوریای هەژاند و لە هەرێمیش
هەستی پێکرا.
