بەڕێوەبەرایەتی چاودێری بازرگانی سلێمانی رایگەیاند، نرخی هێلکە هەنگاو بە هەنگاو دادەبەزێت.
ئەمڕۆ شەممە، چاودێری بازرگانی سلێمانی رایگەیاند، پارێزگاکە رۆژانە پێویستی بە ٧٠٠ هەزار هێلکە هەیە بۆ پڕکردنەوەی پێداویستی ناوخۆ و ١١ کیڵگە هەیە بۆ بەرهەمهێنانی هێلکە.
سۆران غەفوور بەڕێوەبەری چاودێری بازرگانی سلێمانی باسی لەوەشکرد، زیادبوونی
خواست لەسەر هێلکە و بەرزبوونەوەی بەهای دۆلار بوەتەهۆی بەرزبوونەوەی نرخی هێلکە و
سلێمانی رۆژانە پێویستی بە دوو هەزار کارتۆن هێلکە هەیە.
ئاماژەی بەوەشدا، بەرزبوونەوەی نرخی هێلکە کاتییە و هەنگاو بە هەنگاو دادەبەزێت.
دوکاندارێکیش دەڵێت، بە هۆی بەرزبوونەوەی نرخی دۆلارەوە بە شێوەیەکی گشتی
خواردەمەنی گران بووە بەڵام بۆ هەر کارتۆنێک هێلکە ١٢ هەزار دیناری چوەتە سەر و ئەمەش
بڕێکی زۆرە.
بەرزبوونەوەی نرخی هێلکە لە کاتێکدایە وەزارەتی کشتووکاڵی هەرێم هەفتەی
رابردوو رایگەیاند، هەرێمی کوردستان لە بەرهەمهێنانی هێلکەدا گەیشتوەتە ئاستی خۆبژێوی
و لە ساڵێکدا ٩١٩ ملیۆن هێلکە بەرهەمدێت.