میدیاکان ئاماژیان بەوەشداوە، بەهۆی ئەوەی هاوڵاتییە ڤێنیزوێلییەکان داوای ڤیزەیان لە ئەرجەنتین نەکردووە، پاسپۆرتەکانیان رادەست کردوون و دەست بەسەر پاسپۆرتی هاوڵاتییە ئێرانییەکانیشدا گیراوە.

دەشڵێن، هاوڵاتییە ئێرانییەکان دەتوانن بە فڕۆکەی تایبەت ئەرجەنتین بجێبهێڵن و بگەڕێنەوە وڵاتی خۆیان.

ئاماژە بەوەش دراوە، چەند پارچەیەکی ئۆتۆمبێل لەناو فڕۆکەی کارگۆیەدا لەلایەن هێزە ئەمنییەکان دۆزراونەتەوە و دەستیان بەسەردا گیراوە.

میدیاکانی ئەرجەنتین باسیان لەوەشکردووە، فڕۆکەکە لە رێکەوتی ٦ی حوزەیران لە کاراکاسی پایتەختی ڤێنیزوێلاوە بەڕێکەوتووە و بەرنامەی بۆ ئەوە داناوە ٧ی مانگ بگەڕێتەوە بۆ شوێنی خۆی، بەڵام بەهۆی نەبوونی سووتەمەنی پێویست، گەشتەکەی هەڵوەشاندووەتەوە.

ئەوەشیان ئاشکرا کردووە، فڕۆکەکە لە رێکەوتی ٨ی حوزەیران بەمەبەستی وەرگرتنی سووتەمەنی لە ئەرجەنتینەوە بەرەو ئۆرۆگوای بەڕێکەوتووە، بەڵام بەهۆی داخستنی کایەی ئاسمانی ئەو وڵاتە، بەبێ وەرگرتنی سووتەمەنی گەڕاوەتەوە ئەرجەنتین.

ئەمە لەکاتێکدایە، مافی بەکارهێنانی ئەم فڕۆکەیە لەلایەن هێڵی ئاسمانیی ماهان کە کۆمپانیای فڕۆکەوانی حکومەتی ئێرانە دراوەتە کارگۆی ئەمتسراسور کە سەر بە کۆمپانیای هێڵی ئاسمانی ڤێنیزوێلایە و لەلایەن ئەمریکایشەوە سزا بەسەر هێڵی ئاسمانیی ماهاندا سەپێندراوە.