ئەوەشی خستەڕوو، ماوەی هەفتەکەی پەتای سکچوون لە زیندانەکەدا بڵاوبووەتەوە و بەشێک لە زیندایەکان توشی پەتاکە بوون، بەڵام دەرمان و چارەسەری پێسویت لە زیندانەکەدا نییە.

بەپێی زانیارییەکانی دەست ئێن ئاڕ تی کەوتووە، ئەو کەسەی گیانی لەدەستداوە لە ساڵی ٢٠٠٨ـەوە لە زینداندایە و بەتۆمەتی بەشداربوون لە تەقینەوەکەی ساڵی ٢٠٠٨ی باڵەخانەی پاڵاس لە سلێمانی؛ سزای زیندانی هەتا هەتایی هەبووە.

ساڵی ٢٠٠٨؛ بەهۆی تەقینەوەی ئۆتۆمبێلێك لە بەردەم ئوتێل سلێمانی پاڵاس لە سلێمانی دوو هاوڵاتی شەهیدبوون و ٣١ـی دیكەش برینداربوون.

کەسێکی نزیک لەو زیندانییەش ئەوەی بۆ ئێن ئاڕ تی ئاشکراکرد، کە لە دەرئەنجامی پشکنینەکانی پزیشکی دادیشدا ئاماژە بەوەکراوە، بەهۆی پەتای سکچوون و رشانەوەوە گیانیلەدەستداوە.

وتیشی، بڕیارە هەر ئەمڕۆ تەرمەکەی بگاتەوە شاری کفری و لەوێ بە خاک بسپێردرێت.

هەر ئەمڕۆش تەندروستی سلێمانی هۆشداریدا لەبارەی بڵاوبوونەوەی پەتای سکچوون و رشانەوە و باسی لەوەکرد، تەنها لەماوەی ١٢ کاتژمێری رابردوودا لەکۆی ٧٠ منداڵی سەردانی نەخۆشخانەی دکتۆر جەمالی منداڵانیان کردووە، ٥٠یان توشی پەتای سکچوون و رشانەوە بوون و هۆکارەکەشی بۆ گۆڕانی کەشوهەوا و پلەکانی گەرما گەڕاندەوە.

بەپێی ئەو زانیارییانەی لە چاوگە تەندروستییەکانیشەوە دەست ئێن ئاڕ تی کەوتووە، پەتاکە لەناو گەورەکانیشدا بڵاوە و چەندین کەس بە هەمان هۆکاری توشبوون بە سکچوون و رشانەوە سەردانی نەخۆشخانەیان کردووە، بەڵام لەناو گەورەکاندا رشانەوەی کەمتر لەگەڵدایە یاخود لە هەندێک لە نەخۆشەکاندا لەگەڵیدا نییە.

ئەو چاوگە باسی لەوەشکرد، کە گەورەکان توانای بەرگەگرتنیان بۆ پەتاکە باشترە و هۆشیاری باشتریان هەیە بەرامبەر بە پەتاکە بەراورد بە منداڵان.بەڵام ئەوە مانای ئەوە ناگەیەنێت خۆپارێزی لای گەورەکان کەمتر ببێت، یاخود مەترسی بڵاوبوونەوەی نەبێت.

ئەمەش لە کاتێکدایە، ساڵانە ئەم نەخۆشییە لەناو منداڵان و گەورەکانیشدا بڵاودەبێتەوە و لە زۆرکاتدا لەکاتی گۆڕانی وەرز بۆ گەرما روودەدات، بەڵام وەک چاوگە تەندروستییەکان باسی دەکەن، ئەمساڵ ڕێژەکە بەشێوەیەکی بەرچاو زیادیکردووە، پزیشکانیش داواى زیاترکردنى رێکارەکانى راگرتنى پاکوخاوێنى دەکەن.

محەمەد عەدنان، کفری

هـ.ئـ