سەردێڕ:

پۆلیسی هەولێر: ئەو کەسە دەستگیرکرا کە هەڕەشەی لە ژنان و کچان دەکرد

PM:12:09:13/05/2022

6204 جار خوێندراوەتەوە

بەڕێوەبەرایەتی پۆلیسی هەولێر رایگەیاند، توانیویانە ئەو تۆمەتبارە دەستگیر بکەن کە هەڕەشەی لە ژنان و کچان کردووە و هۆکار بووە بۆ خۆکوشتنی کچێکی خوێندکاری پەیمانگای تەکنیکی هەولێر.


وتەبێژی پۆلیسی هەولێر رایگەیاند، لە رێگەی هاوڕێکانی کچکەوە کە باسیان لەوە کردووە کەسێک هەبووە و هەڕەشەی لێکردووە و دوای لێکۆڵینەوەکان لە ناو مۆبایلی کچەکەدا دەرکەوتووە کەسێکە بە هەژماری ساختە هەڕەشەی کردووە و دواتر توانراوە شوێنەکەی دەستنیشان بکرێت و دەستگیر بکرێت.

بەگوێرەی زانیارییەکانی موراد ئەحمەد پەیامنێری ئێن ئاڕ تی، لە رۆژی ١٩ی مانگی رابردوو کچێک دوای دوو رۆژ لە دیارنەمانی، تەرمەکەی دۆزراوەتەوە و دوای ئەوەی دەست بە لێکۆڵینەوەکان کراوە دەرکەوتووە رووداوەکە خۆکوژی بووە و هۆکارەکە کەسێک بووە کە هەڕەشەی لێکردووە.

هاوکات ئاماژەی بەوەشکرد، پۆلیس گەنجەکە تۆمەتبار دەکات بە خۆکوشتنی کچەکە و دواتریش کاتێک تۆمەتبارەکە زانیویەتی لێکۆڵینەوە دەستی پێکردووە، چووەتە رانییە و بە هەماهەنگی پۆلیس لەوێ دەستگیرکراوە.

پەیامنێری ئێن ئاڕ تی باسی لەوەشکرد، کچەکە ناوی رەیان محەمەد بووە و تەمەنی ٢١ ساڵ بووە.

دوای ئەوەی تۆمەتبارەکە دەستگیرکراوە و دەست بە لێکۆڵینەوەکان کراوە دەرکەوتووە، تۆمەتبارەکە هەڕەشەی لە چەند کچ و ژنێکی دیکە کردووە.














گەلەری