PM:07:12:28/08/2024
316 جار خوێندراوەتەوە
+
-
کوڕ و کچە کوردەکان
عێراقیان گەیاندە یاری کۆتایی تۆپی سەرمێزی رۆژئاوای ئاسیا.
لە پاڵەوانێتی تۆپی
سەرمێزی وڵاتانی رۆژئاوای ئاسیا، هەڵبژاردەی کوڕان و کچانی عێراق توانیان بلیتی
یاری کۆتایی بەدەستبهێنن، کوردەکانیش هۆکاری سەرەکی ئەو دەستکەوتە بوون.
یارییەکانی پاڵەوانێتییەکە
لە وڵاتی ئوردون بە بەشداری هەڵبژاردەکانی عێراق و بەحرەین و قەتەڕ و عێراق و
ئوردون و سوریا و فەلەستین و ئیمارات و یەمەن و لوبنان بەردەوامی هەیە، دوای
رکابەریەکی توند هەڵبژاردەی کچانی عێراقی 17 ساڵ وەک ئەسپی رەش دەرکەوتن و توانی
بگات بە یاری کۆتایی.
لە قۆناغی پێش
کۆتاییدا، هەڵبژاردەی کچانی عێراق رووبەڕووی ئوردون بووەوە و هەر لە یاری یەکەمەوە
رکابەریەکی توند لە نێوان یاریزانانی هەردوو هەڵبژاردە دروستبوو، تا کار گەیشتە یاری
یەکلاکەرەوە کە یاری چوارەمە.
لەو یاریەدا بارین
شاخەوان یاریزانی کوردی هەڵبژاردەی عێراق و یانەی ئاشتی یاریکرد، توانی ئاستێکی سەرنجڕاکێش
پێشکەش بکات و بە ئەنجامی سێ بە یەک سەرکەوتنی بەدەستهێنا.
لە کۆتاییشدا کچانی
عێراق بە ئەنجامی سێ بە یەک یاریەکەی بردەوە و خۆی گەیاندە یاری کۆتایی و لەو قۆناغەشدا
رووبەڕووی کچانی سوریا دەبێتەوە.
لەسەر ئاستی
کوڕانیش بۆ تەمەنی 13 ساڵان و لە یاری دوانیدا، دارین چاوان و لاوی ژیار کە
یاریزانی کوردن، توانیان لە قۆناغی پێش کۆتاییدا بردنەوە بەسەر هەڵبژاردەی لوبنان
بەدەستبهێنن و بۆ رووبەڕووبونەوەی ئیمارات بگەن بە یاری کۆتایی.