سەرۆکی ئەنجومەنی مسوڵمانەکانی ئۆکرانیا رایگەیاند، لەمساڵدا مسوڵمانانی ئۆکرانیا مانگی رەمەزان لە بارودۆخێکی سەخت و جەنگدا بەسەر دەبەن و زیاتر لە ٩٠٪ی مسوڵمانەکان ماڵەکانیان چۆڵکردووە و ئاوارەبوون.
سيران عريفوف سەرۆکی ئەنجومەنی مسوڵمانەکانی ئۆکرانیا لە لێدوانێکیدا بۆ ماڵپەڕی سکای نیوزی عەرەبی ئاماژەی بەوەداوە، بەهۆی ئەوەی ئەو ناوچانەی مسوڵمانەکان لێدەژین نزیکە لە ناوچەکانی جەنگ و ناکۆکی نێوان سوپای ئۆکرانیا و روسیا٩٠٪ ی هاوڵاتییە مسوڵمانەکانی ئۆکرانیا ماڵەکانیان جێهێشتووە و ئاوارەبوون.
باسی لەوەشکردووە، بەهۆی نالەباری بارۆدۆخی
ئۆکرانیا و هەبوونی جەنگ لەو وڵاتەدا چەند فتوایەکی تایبەتیان بە جەنگ دەرکردووە بە مەبەستی ئاسانکاری بۆ مسوڵمانان وەک ئەنجامدانی نوێژی تەراویح لە
ماڵەوە و نەچون بۆ مزگەوتەکان.
سيران عريفوف دەشڵێت، "هەرچەندە
لە ئۆکرانیا مزگەوتەکانمان بەهۆی جەنگەوە چۆڵبوون و بونەتە جێی هێرشی روسیا، بەڵام
مسوڵمانانمان سورن لەسەر بەجێگەیاندنی ئەرکی رۆژوگرتن."
ئاشکراشیکردووە، ئەنجومەنی
مسوڵمانەکانی ئۆکرانیا بە دریژای مانگی رەمەزان خوانی بەربانگ بۆ مسوڵمانەکان و
ئاوارەکانی وڵاتەکە دابین دەکات و بەردەوام دەبن لەکاری چاکە.
ئەمەش لە کاتێکدایە، بە گوێرەی ئامارەکان ئاینی ئیسلام دووەم ئاینی
سەرەکییە لە ئۆکرانیا و لە ٢٤ ی شوباتەوە ئەو وڵاتە روبەڕوی هێرشی سوپای روسیا
بونەتەوە و بەشێکی زۆری هاوڵاتییەکانی ئاوارەبوون.