AM:11:44:24/03/2026
968 جار خوێندراوەتەوە
وەزارەتی پێشمەرگە رایگەیاند، "بەرەبەیانی ئەمرۆ لە دوو هێرشی جیاواز دا ، بارەگایەکی فیرقەی حەوتی پیادەی دەڤەری یەک و هێزێکی فرقەی پێنجی پیادەی هێزی پێشمەرگە لە سنووری سۆران، لە کردەوەیەکی دوژمنکارانە و بە غەدر و خیانەت و دوور لە هەموو ئاکارێکی مروڤایەتی و دراوسێیەتی، بەر هێرشی شەش موەشەکی بالیستی ئێرانی کەوتن و لە ئەنجامدا شەش پێشمەرگەی قارەمان شەهید و ٣٠ پێشمەرگەی دیکەش بریندار بوون".
ئەمڕۆ سێشەممە ٢٤ـی ئازاری ٢٠٢٦، وەزارەتی پێشمەرگە لە راگەیەندراوێکدا بڵاویکردەوە، " لە کاتێکدا کە بە توندترین شێوە ئەم هێڕشە و هەموو هێڕشە تیروریستیانەی تر کە دەکرێنە سەر هەرێمی کوردستان شەرمەزار دەکەین، دووپاتی دەکەینەوە کە ئێمە هەموو مافێکمان هەیە بۆ بەرپەرچدانەوەی هەر دەستدرێژیەک کە دەکرێتە سەر گەل و خاکەکەمان".
ئاماژەی
بەوەشکرد، "بە هیچ جورێک چاوەڕوانی ئەوەمان نەدەکرد بەم جۆرە نامەردانە،
وەڵامی هەڵوێستی ئاشتیخوازانەی هەرێمی کوردستان بدرێتەوە بەڵام تەمەنی غەدر و ستەم
کورتە و ئیرادەی ئاشتیخوازی سەردەکەوێت".
باسی لەوەشکرد،
پرسە و سەرەخۆشییان ئاڕاستەی بنەماڵە و کەسوکاری شەهیدەکان دەکەن و هیوای
چاکبوونەوەی خێراش دەخوازن بۆ بریندارەکان و جارێکی دیکەش داوا لە هەموو لایەک
دەکەن، شەڕ و ئاژاوە لە هەرێمی کوردستان بە دوور بگرن و داواش لە حکومەتی فیدراڵ و
کۆمەڵگەی نێودەوڵەتی و هەموو دۆستان دەکەن بەرامبەر ئەم پێشێلکاریانە بێدەنگ نەبن
و سنوورێک بۆ ئەم دەستدرێژییە بێباکانە دابنرێت.
