وەزیری دەرەوەی ئێران دەڵێت، دانوستانەکان ناڕاستەوخۆبوون و پەیوەستبوون بە پرسی ئەتۆم، پیتاندنی یۆرانیۆم مافی ئێرانە و سفرکردنەوەی لە دەرەوەی دانوستانەکاندایە، خوازیاریشن متمانە لەنێوان تاران و واشنتن دروستببێت لە دانوستانەکاندا.
ئەمڕۆ شەممە ٧ـی شوباتی ٢٠٢٦، عەباس عەراقچی، وەزیری دەرەوەی ئێران لە نوێترین لێدوانیدا لەبارەی دانوستانەکانی نێوان ئێران و ئەمەریکا وتی، دانوستانەکان ناڕاستەوخۆبوون و تەنها پرسی ئەتۆم تاوتوێکرا.
وتیشی، پیتاندنی
یۆرانیۆم مافێکی رەوایە و سفرکردنەوەی توانای پیتاندن و دەوڵەمەندکردن لە دەرەوەی
دانوستانەکاندایە، ئەوان لەڕێگەی بۆردومانەوە نەیانتوانی تواناکانی ئێران لەناوبەرن
و دانوستانیش هەروادەبێت و واشنتن دانی بەوەداناوە کە بەڕێگەی سەربازیی بۆی چارەسەرنەکراوە
و دەبێت بە دانوستان چارەسەر بکرێت.
عەراقچی جەختی
لەوەکردەوە کە دەستبەرداری پرسی ئەتۆم نابن و راددەی پیتاندنی یۆرانیۆمیش بەندە بە
پێویستییەکانی ئێرانەوە و هیچ یۆرانیۆمێکی پیتێندراویش لە ئێران ناچێتە دەرەوە، لەبارەی
بابەتی موشەکیشەوە وتی، بابەتی موشەک پرسی بەرگرییە و دانوستانی لەسەر ناکرێت.
عەباس عەراقچی
وتیشی دانوستانەکان سەرەتایەکی باشن، لەگەڵ ئەوەشدا رێگەیەکی دوورودرێژیان لەپێشە
تا متمانە لەنێوان تاران و واشنتدا دروستببێت.