وەزیری دەرەوەی فەرەنسا دەڵێت، وڵاتەکەی پاڵپشتی خۆی بۆ جێبەجێکردنی رێککەوتنەکە دووپات کردەووتەوە، جەختی لەسەر گرنگی ئەم قۆناغە کردەوە لە پتەوکردنی سەقامگیری و بەردەوامیی شەڕ دژی تیرۆر.

مەزڵوم عەبدیش وتی، پابەندن بە جێبەجێکردنی رێککەوتنی ٢٩ـی كانوونی دووەم و هەوڵەکانیان بەردەوامە بۆ بەرەنگاربوونەوەی داعش و دەستەبەرکردنی ئاسایشی ئەو دامەزراوانەی کە چەکدارانی داعش و خێزانەکانیان تیایدا راگیراون.

هاوکات، ناوەندی راگەیاندنی هەسەدە دەڵێت، کۆبوونەوەکە بە بەشداری مەزڵوم عەبدی و وەزیری دەرەوەی فەڕەنسا، رۆهڵات عەفرین، فەرماندەی (یەپەژە) و ئیلهام ئەحمەد، هاوسەرۆکی فەرمانگەی پەیوەندییەکانی دەرەوەی ئیدارەی خۆسەر بووە.

وتیشی، لە كۆبونەوەكەدا باسیان لە رێگا و میکانیزمەکانی جێبەجێکردنی رێککەوتنی ٢٩ـی كانوونی دووەم کردووە و جەختیان لە پێویستی جێبەجێکردنی كردووە بەشێوەیەكی تەواوەتی و گفتوگۆیان کردووە لەبارەی بەردەوامی هەوڵە هاوبەشەکان، لە روبەڕوبوونەوەی داعش و پاراستنی ئاسایشی دامەزراوەکانی دەستبەسەركردنی چەکدارانی داعش و کەسوکارەکانیان.

هەروەها، باس لە گرنگی پاراستنی تایبەتمەندی ناوچە کوردییەكان و پاراستنی مافەکانی گەلی کورد لە سوریا کرا، وێڕای لە یەکخستنی هێزە سەربازی و ئەمنییەکان بە هەموو وردەکارییەکانییەوە بە شێوەیەک کە خزمەت بە سەقامگیری و ئاسایشی سەرتاسەری ناوچەکە بکات.