PM:05:17:27/10/2024
820 جار خوێندراوەتەوە
وەزیری نەوتی عێراق رایگەیاند، بە ئامانجی پەرەپێدانی کێڵگە نەوتی و غازییەکان و زیادکردنی بەرهەمەکان لەگەڵ ژمارەیەک کۆمپانیای ناوخۆیی و نێودەوڵەتی چەند گرێبەستێکیان واژۆ کردووە. دەشڵێت، لەڕێگەی گرێبەستەکانەوە نزیکەی ٨٥٠ پێ سێجا غاز و ٧٥٠ هەزار بەرمیل نەوت زیاد دەکەن.
ئەمڕۆ یەکشەممە، حەیان عەبدولغەنی وەزیری نەوتی عێراق رایگەیاند، لە چوارچێوەی هەنگاوەکانی محەمەد شیاع سودانی سەرۆک وەزیرانی عێراق بۆ وەبەرهێنان لە کەرتی نەوت و غاز،چەند گرێبەستێکیان لەگەڵ ژمارەیەک کۆمپانیا واژۆ کردووە.
ئاماژەی بەوەش کرد، هەوڵەکانی وەزارەتی نەوتی عێراق بە مەبەستی زیادکردنی
یەدەگی نەوت و غاز بەردەوامە، بەوپێیەی هۆکارێکی گرنگن بۆ گەشەی بەردەوامی
ئابووریی عێراق.
باسی لەوەش کرد، پڕۆژەکانی پەیوەست بەو بوارە سووتەمەنی پێویست بۆ
وێستگەکانی بەرهەمهێنانی کارەبا و پیشەسازییەکانی دیکە دابین دەکەن، ئەوەش جگە
لەوەی هەلی کاری زیاتر بۆ دەرچوان و کرێکاران دەڕەخسێنێت.
ئەوەشی خستە روو، ئەو کۆمپانیانەی کە گرێبەستەکانیان لەگەڵ ئەنجام
دراون بریتین لە کۆمپانیای (یو ئی جی)ـی چینی، کۆمپانیای جیۆ جەید، کۆمپانیای (کەی
ئەی ئاڕ)ـی عێراقی، کۆمپانیای سیپۆنتیکی چینی و چەند کۆمپانیایەکی دیکە.
