ئاماژەی بەوەش کرد، "پارتی و یەکێتی لە ئێستادا کێشە بۆ مووچە دروست دەکەن و بە مەبەست ناردنی لیستی مووچەخۆران بۆ بەغدا دوا دەخەن جا وەرە دەربچنەوە لە هەڵبژاردن". دەشڵێت، دوای هەڵبژاردن یەکێتی و پارتی زۆر خراپتر لە ئێستا بەسەر هاوڵاتییان دەهێنن ئەگەر دەربچن لە هەڵبژاردن.

وتیشی، "بەغدا مەبەستیەتی یەکێتی و پارتی بیانوویان نەمێنێت و هەڵبژاردن بکرێت لە بەغداوە زانیارییم پێ دراوە ئەم چەند مانگەش پارە دەنێرن بۆ ئەوەی هەڵبژاردن بکرێت".

باسی لەوەش کرد، دەسەڵات لە هەرێم مانگانە بە فرۆشتنی نەوتی قاچاخ و داهاتی ناوخۆ ٨٠٠ ملیۆن دۆلاری دەست دەکەوێت و پارەکەشی دیار نیە.

جەختی لەوەش کردەوە، نەوەی نوێ ئامادەیە مەرجەکانی بەغدا بۆ مووچە و خۆشگوزەرانی هاوڵاتییان جێبەجێ بکات و ئامانج و دروشمی نەوەی نوێ دروستکردنی یەک هەرێم و یەک ئیدارەی سەربەخۆ و بەهێزە، هەروەها نەوەی نوێ بەشێک نیە لەو گەندەڵییەی کە هەیە بۆیە لە بەغدا رێزی لێ دەگرن.

راشیگەیاند، "بە فەرمانی خودا و بە دەنگەکانی خەڵک، نەوەی نوێ دەسەڵات دەگرێتە دەست و هەر یەکەم رۆژ حکومەت بگرینە دەست پارەی ئاو و کارەبا و باج و قەرزی هاوڵاتییان لادەبەین". دەشڵێت، با هاوڵاتییان چوار ساڵ نەوەی نوێ تاقیبکەنەوە ئەوکات جیاوازییەکەی دەبینن.