فەرماندەی گشتیی هێزەکانی سووریای دیموکرات (هەسەدە)، لە لێدوانێکیدا رەوشی سەربازیی باکوور و رۆژهەڵاتی سووریای بە مەترسیدار وەسف کرد. دەشڵێت، "ناوچە کوردییەکان هێڵی سوورن و بە توندی بەرگرییان لێدەکەن".
ئەمڕۆ سێشەممە ٢٠ـی کانونی دووەمـێ ٢٠٢٦، مەزڵووم عەبدی، فەرماندەی گشتیی هێزەکانی سووریای دیموکرات رایگەیاند، هێزەکانیان پاشەکشەیان کردووە بۆ ئەو ناوچانەی زۆرینەی دانیشتووانیان کوردن و جەختی کردەوە کە پاراستنی ئەم ناوچانە هێڵی سوورە و بە توندی بەرگرییان لێ دەکەن.
ئاشکرای کرد کە کەمپی هۆڵ (کە تایبەتە بە کەسوکاری
چەکدارانی داعش) لە ئێوارەی دوێنێوە رووبەڕووی هێرشی توند و هەوڵی کۆنترۆڵکردن بووەتەوە،
ئاماژەی بەوەش کرد کە پاسەوانانی کەمپەکە بەهۆی هێرشی تانک و زرێپۆشەکانەوە، ناچار
بە پاشەکشە کراون.
فەرماندەی گشتیی هەسەدە حکومەتی سووریای تۆمەتبار
کرد بەوەی هێرشە چڕەکانی بۆ سەر حەسەکە و کۆبانێ بەردەوامە و ئامادە نییە هیچ دەسپێشخەرییەکی
ئاشتی و راگرتنی شەڕ قبوڵ بکات کە لە دوو هەفتەی رابردوودا پێشکەش کراون.
هۆشداری دا لەوەی هێرشەکان بۆ سەر بنکەکانی دەستبەسەرکردنی
چەکدارانی داعش لە "شەدادی" و کەمپی "هۆڵ" گەیشتووەتە ئاستێکی
مەترسیدار، داواشی لە هاوپەیمانی نێودەوڵەتی کرد بەرپرسیارێتیی خۆیان لە پاراستنی
ئەو شوێنانە هەڵبگرن.
مەزڵووم عەبدی لە کۆتاییدا سڵاوی بۆ بەرخودانی
خەڵک و شەڕڤانان نارد لەو ناوچانەی کە بە وتەی ئەو، رووبەڕووی "کوشتنی سیستماتیکی
کوردان" دەبنەوە.