PM:10:45:29/08/2025
10952 جار خوێندراوەتەوە
وەزارەتی بازرگانی عێراق، رۆژی دووشەممە ١ـی ئەیلولی وەک دوا وادەی دیاریکرد بۆ نوێکردنەوەی داتاکانی کارتی بەشەخۆراک بۆ هاوڵاتیان و لەدوای ئەم بەروارەوە نوێکردنەوە تەنها لەڕێگەی ناوەندەکانی بەشەخۆراکەوە ئەنجامدەدرێت و پارەش وەردەگیرێت.
ئەمڕۆ هەینی ٢٩ـی ئابی ٢٠٢٥، محەمەد حەنون، وتەبێژی وەزارەتی بازرگانی عێراق لە بەیاننامەیەکدا وتی، ژمارەی ئەو کەسانەی داتای کارتی بەشەخۆراکی ئەلیکترۆنییان نوێکردۆتەوە گەیشتووەتە ٣٧ ملیۆن هاوڵاتی لە ناوخۆی عێراق، رۆژی ١ـی ئەیلولیشی وەک دوا وادە بۆ تەواوکردنی پرۆسەی نوێکردنەوە دیاریکرد.
ئاماژەی بەوەشکرد، لەدوای ئەم وادەیە، هاوڵاتیان دەتوانن بە سەردانکردنی ناوەندەکانی بەشەخۆراک یان پێدانی رسومات بە رەزامەندی وەزارەتی دارایی، داتاكانیان تازە بكەنەوە.
وتیشی، رێژەی بەشداریکردن لە پارێزگاكانی هەرێمی کوردستان گەیشتووەتە ٨٥٪ لە هەڵەبجە، ٨٩٪، هەولێر ٨٧٪ ، سلێمانی ٨٦٪ و دهۆک ٨٢٪، بەمەش کۆی ئەو کەسانەی داتاکانیان لە هەرێم نوێکردووەتەوە گەیشتووەتە زیاتر لە چوار ملیۆن و ٦٠١ هەزار هاوڵاتی.
باسی لەوەشکردووە، لە پڕۆسەكانی وردبینیدا دەرکەوتووە کە دوو ملیۆن و ٧٥٠ هەزار ناوى نادیارن یان بە هۆکاری جیاواز راگیراون.
