كۆمسیۆنی باڵای هه‌ڵبژاردنه‌كانی عێراق سیستمێكی تایبه‌ت به بانگه‌شه‌ی هه‌ڵبژاردن په‌سند ده‌كات، هاوكات هۆشداری ده‌دات و ده‌ڵێت، له ئه‌گه‌ری سه‌رپێچیكردنی سیسته‌مه‌كه، كاندید دوور ده‌خرێته‌وه.
ئەمڕۆ چوارشه‌ممه، ٢٧ـی ئابی ٢٠٢٥، كۆمسیۆنی باڵای هه‌ڵبژاردنه‌كانی عێراق سیسته‌می ژماره (٤)ـی تایبه‌ت به بانگه‌شه‌ی هه‌ڵبژاردنی خولی داهاتووی په‌رله‌مان راگه‌یاند و سه‌رجه‌م حزب و هاوپه‌یمانی و كاندیده‌كان پابه‌ند ده‌كات، به هیچ شێوه‌یه‌ك پاره‌ی گشتیی ده‌وڵه‌ت بۆ بانگه‌شه‌ی هه‌ڵبژاردن به‌كار نه‌هێنن.
ده‌شڵێت، هه‌ر حزب
و هاوپه‌یمانی و كاندیدێك پابه‌ندی ئه‌م سیسته‌مه نه‌بێت، رووبه‌ڕووی سزای توند
ده‌بێته‌وه، له‌وانه‌ش دوورخستنه‌وه‌یان له پرۆسه‌ی هه‌ڵبژاردن و جه‌ختیشی
كردووه‌ته‌وه، به هیچ شێوه‌یه‌ك نابێت به‌ر له واده‌ی ده‌ستپێكردنی بانگه‌شه‌كان،
هیچ كه‌س و لایه‌نێك بانگه‌شه بكات.
كۆمسیۆن روونیشیكردووه‌ته‌وه، ١٩ لیژنه‌ی سه‌ره‌كییان له نووسینگه‌ی نیشتمانیی پێكهێناوه
هاوكات له‌گه‌ڵ چه‌ند لیژنه‌یه‌كی دیكه له نووسینگه‌ی پارێزگاكان بۆ
چاودێریكردنی هه‌ر سه‌رپێچییه‌ك له لایه‌ن حزب و هاوپه‌یمانی و كاندیده‌كان، تا ئێستاش هیچ سه‌رپێچییه‌ك تۆمار نه‌كراوه.
ئەوەش لە کاتێکدایە،
رۆژی ٩ـی نیسانی ٢٠٢٥، نووسینگەی راگەیاندنی محەمەد شیاع سودانی، سەرۆک وەزیرانی عێراق
بڵاوی کردبووەوە، ئەنجوومەنی وەزیران بە زۆرینەی دەنگ، ١١ـی تشرینی دووەمـی
ئەمساڵ وەکو رۆژی هەڵبژاردنی داهاتووی پەرلەمانی عێراق دیاریی کرد.