ئەوەی بووە جێی سەرنجی میدیاکان ئەوە بوو مێسی بەشداری لە ڕێوڕەسمەکەدا نەکرد و تەنانەت هیچ کەسێکیشی نەناردبوو خەڵاتەکە وەربگرێت، هەر زوو دەستەی کارگێڕی یانەی وەرزشی ئینتەر مەیامی کە لە ئێستادا میسی یاری بۆ دەکات راگەیەندراوێکی بڵاوکردەوە و بەهانەی بۆ ئامادە نەبوونی مێسی هێنایەوە و وتبووی، مێسی زۆر سەرقاڵ بووە و بەهۆی خشتەی یارییەکانییەوە نەیتوانییەوە لە مەراسیمەکە بەشداربێت، ئەگەرنا ئەوان سوپاس و پیزانینیان بۆ سەرۆکی ئەمریکا هەیە و خەڵاتەکەیان بەرز دەنرخێنن.

دوای چەند کاتژمێرێک چەند وێنەیەکی مێسی لە تۆڕە کۆمەڵایەتییەکان بڵاوبووەوە و دەرکەوت کە لە شاری ڕۆزاریۆی ئەرجەنتین کە شوێنی لەدایکبوونەکەیەتی لەگەڵ هاوڕێکانی منداڵی سەرقاڵی کاتبەسەربردن و یاری خۆشی بووە کە ئەمەش لەلایەن میدیا جیهانییەکانەوە وەک خەمساردییەکی ئەو یاریزانە بەرامبەر بە خەڵاتێکی لەو چەشنە لێکدرایەوە.

خەڵاتەکە بەمەدالیای ئازادیی سەرۆکایەتی ئەمریکا ناسراوە و ساڵانە دەدرێت بە کەسایەتییە مەدەنییەکان. میسیش یەکێک بووە لەو کەسایەتییانەی لەپای بەرەوپێشبردنی یانەى ئینتەر میامی و باشترکردنی ناوبانگی وەرزشی ئەمریکا ناوی لە لیستەکەدا تۆمارکراوە.