وەزارەتی دەرەوەی چین رایگەیاند، لەسەر هەموو لایەنەکان پێویستە پشتیوانی لە روسیا و ئۆکرانیا بکەن بۆ رۆیشتن بە هەمان ئاڕاستە و دەستپێکردنەوەی گفتوگۆی راستەوخۆ لە نێوانیاندا بە زووترین کات.

لیو کیشیاو مینگی باڵیۆزی پێشووی چین لە توێتێکدا نوسیویەتی، هەڵوێستی چین لە بارەی جەنگی ئۆکرانیا روونە و بە بڕوای ئەوان ململانێ و رووبەڕووبوونەوە هیچ براوەیەک بەرهەم ناهێنێت و گفتوگۆ و دانوستان تاکە رێگای دەرچوونە لە قەیرانەکە.

دوێنێ ڤۆلۆدمیر زیلێنسکی سەرۆکی ئۆکرانیا وتی، "پێشەوای دەکەن لە رێکاری گفتوگۆکانی پەکین، لە کاتێکدا هاوپەیمانێکی ئاشکرای روسیایە."

لەلایەکی دیکەوە خۆرخێ تۆلیدۆ باڵیۆزی یەکێتی ئەوروپا لە چین رایگەیاند، لەسەر چین پێویستە بەرپرسیارێتی خۆی بنوێنێت و بەرگری لە جاڕنامەی نەتەوە یەکگرتووەکان بکات لە دوژمنایەتی روسیا.

پێشنازی دانوستانی ئاشتی نێوان روسیا و ئۆکرانیا کە لەلایەن حکومەتی چینەوە داڕێژراوە لە ١٢ بڕگە پێک دێت:

برگەی یەکەم(گرنگی رێزگرتن لە سەروەری هەموو وڵاتان): چونکە هەمووان یەکسانن و نابێت چاو لە قەبارە و هێز و سامان بکرێت و پێویستە یاسای نێودەوڵەتی بە شێوەیەکی گشتگیر جێبەجێبکرێت.

برگەی دووەم(بیرکردنەوەی جەنگی سارد): دەستبەرداربوون لە بیرکردنەوەی جەنگی سارد، نابێت گرەنتی ئاسایشی وڵاتێک لەسەر هەژماری وڵاتانی دیکە بێت و ناکرێت گرەنتی هەرێمی لە رێگەی پتەوەکردنی فراکسیۆنی سەربازییە و فراوانکردنی بکرێت و گرنگە رێز لە بەرژەوەندی ئاسایاشی هەموو وڵاتان بگیرێت و بە شێوەیەکی گونجاو چارەسەربکرێت.

بڕگەی سێیەم(راگرتنی جەنگ و ململانێ): راگرتنی کوشتار و جەنگ چونکە لە جەنگ و ململانێدا براوە بوونی نییە و لەسەر هەموو لایەنەکان پێویستە بە ژیری و خۆڕاگریییەوە مامەڵە بکەن و رێگری بکەن لە گرژبوونی زیاتر و چوونە دەرەوەی قەیرانی ئۆکرانیا لە کۆنتڕۆڵ، دەستپێکردنەوەی گفتوگۆی راستەوخۆی لە نێوان روسیا و ئۆکرانیا گرنگە.

بڕگەی چوارەم(دانووستانی ئاشتی): گفتوگۆ و دانووستان تاکە ئامڕازی راستەقینەن بۆ دەرچوون لە قەیرانی ئۆکرانیا و پێویستە هەموو هەوڵەکان هانبدرێن بۆ دۆزینەوەی چارەسەری ئاشتیخواز و هێورکردنەوەی دۆخەکان و دابینکردنی سەکۆیەک بۆ دەستپێکردنەوەی دانووستانەکان لە نێوان روسیا و ئۆکرانیا.

بڕگەی پێنجەم (چارەسەرکردنی قەیرانی مرۆیی): پێویستە هەموو ئەو رێکارانەی هەوڵی کەمکردنەوەی قەیرانی مرۆیی دەدەن پشتیوانی بکرێن و پرۆسە مرۆییەکان پابەند بن بە بنەمای بێلایەنی و دادپەروەری خۆ بەردوورگرتن لە بە سیاسیکردنی دۆسیە مرۆییەکان.

بڕگەی شەشەم (پاراستنی سەلامەتی هاوڵاتیانی مەدەنی): پێویستە هەموو لایەنەکان پابەندبن بە یاسای مرۆڤایەتی نێودەوڵەتی و بە ئامانجنەگرتنی هاوڵاتی مەدەنی و پاراستنی مافی خێزانەکان.

بڕگەی حەوتەم (پاراستنی سەلامەتی وێستگە ئەتۆمییەکان): پێویستە رێگری لە هێرشی چەکداری بۆ سەر بنکە ئەتۆمییەکان بکرێت و پشتیوانی لە رۆڵی بنیادنان بکرێت کە لەلایەن دەزگای نێودەوڵەتی ئەتۆمی لە پتەوکردنی ئاسایشی ئەتۆمی نواندنی بۆ دەکرێت.

بڕگەی هەشتەم (کەمکردنەوەی مەترسی ستراتیژی): پێویستە رێگری لە بەکارهێنانی چەک و هەڵگیرسانی جەنگی ئەتۆمی بکرێت هەڕەشەکانی بەکارهێنانی ئەو جۆرە رابگیرێت.

بڕگەی نۆیەم (گرەنتیکردنی هەناردەی دانەوێڵە): چین داوا لە هەموو لایەنەکان دەکات رێکەوتنی تۆکمە لەسەر گواستنەوەی دانەوێڵە لە رێگەی دەریای رەشەوە بکەن و هەماهەنگی نێودەوڵەتی لە بواری ئاسایشی خۆراک بوونی هەبێت.

بڕگەی دەیەم (راگرتنی سەپاندنی سزای یەکلایەن): چین لەگەڵ سەپاندنی سزای یەکلایەنە نییە لە جەنگی ئۆکرانیادا چونکە بەربەستەکان هاوکاری چارەسەرکردنی کێشەکان ناکەن بەڵکو کێشەی نوێ دروست دەکەن.

بڕگەی یانزەهەم (گرەنتی کردنی سەقامگیری زنجیرەی پیشەسازی): چین دژایەتی لە بە سیاسیکردنی سیستەمی ئابوری جیهانی و بەکارهێنانی وەک ئامڕاز و چەک دەکات.

بڕگەی دوانزەهەم (بنیادنانەوەی دوای جەنگ): چین ئامادەیی خۆی دەردەبڕێت بۆ هاوکاری کردن لە بواری بنیادنانەوە لەو ناوچانەی بەهۆی جەنگەوە زیانیان بەرکەوتووە.

ئەمەش لە کاتێکدایە، دوێنێ ماریا زاخارۆڤا وتەبێژی وەزارەتی دەرەوەی روسیا زانیاری لە بارەی پێشنازی ئاشتی داڕێژراو لەلایەن چینەوە ئاشکرا کرد و ئەمریکاش چاوەڕوانی پێشنیازەکەی چینە کە هاوپەیمانێکی گەورەی روسیایە.

ئەمڕۆ ساڵیک بەسەر هەڵگیرسانی جەنگی نێوان ئۆکرانیا و روسیا تێپەڕبوو، ئەم جەنگە بووە هۆی دروستبوونی گرفت لە ئاسایشی خۆراک و بەرزبوونەوەی نرخی خۆراک و سووتەمەنی کاریگەری لەسەر زۆرینەی وڵاتانی جیهان هەبوو.