PM:03:24:16/01/2026
348 جار خوێندراوەتەوە
+
-
بڕیارێکی دۆناڵد ترەمپ هاوڵاتیانی چەندین وڵاتی
سەبارەت بە تەماشاکردنی مۆندیالی 2026 لە نزیکەوە نیگەران کردووە.
بەهۆی بڕیارێکی نوێی ئیدارەی دۆناڵد ترەمپ بۆ
قەدەغەکردنی گەشت و سنووردارکردنی ڤیزا بۆ هاوڵاتیانی نزیکەی 75 وڵات، هاندەرانی
مۆندیالی 2026 و بەتایبەتی عەرەبەکان تووشی نیگەرانییەکی گەورە بوون.
ئەم بڕیارە وڵاتانی وەک میسر، مەغریب، جەزائیر،
تونس و ئوردن دەگرێتەوە، هەروەها قەدەغەی گشتی خراوەتە سەر هاوڵاتیانی سێنیگال و
کۆتدیڤوار.
هەرچەندە وەزارەتی دەرەوەی ئەمریکا رایگەیاندووە
کە بڕیارەکە تەنها ڤیزای نیشتەجێبوون واتا کۆچبەری دەگرێتەوە و ڤیزای گەشتیاری
ناگرێتەوە، بەڵام داوا لە کونسوڵخانەکان کراوە وردتر بن لە پێدانی ڤیزا و
هەڵسەنگاندن بۆ تەمەن، باری تەندروستی و ئاستی زمانی ئینگلیزی داواکاران بکەن بۆ
ئەوەی دڵنیابن نابنە بارگرانی دارایی بەسەر ئەمریکاوە.
سەرۆک
ترەمپ هۆکاری ئەم توندکردنەوەیەی بۆ کەموکوڕی ئەمنی لەو وڵاتانە گەڕاندەوە، بەڵام
جەختی کردەوە کە یاریزانان و شاندە فەرمییەکان جیاوازن و مامەڵەی جیاوازیان لەگەڵ
دەکرێت.
لەگەڵ ئەم فشارانەشدا، هاندەرانی ئەو وڵاتانە
هێشتا دەتوانن گەشت بکەن بۆ مەکسیک و کەنەدا کە هاوبەشن لە میوانداریکردنی
مۆندیال، بۆ ئەوەی لەوێوە بینەری یارییەکان بن.