پۆلیسی هەڵەبجە کەسێکی بە تۆمەتی کوشتنی دوو گەنج و بریندارکردنی گەنجێکی دیکە دەستگیرکرد، وتیشی، تۆمەتبار خۆی رادەستی پۆلیس کردووە و دانی بە تاوانەکەیدا ناوە.
ئەمڕۆ پێنجشەممە ٧ـی تەمموزی ٢٠٢٥، بەڕێوەبەرایەتیی پۆلیسی هەڵەبجە بڵاویکردەوە، دوای ئەوەی لە بەرەبەیانی رۆژی ٥ـی ئەم مانگە کەسێک کە بە سواری ماتۆڕسکیل و کڵاوەوە، لە گەڕەکی فەرمانبەران تەقەی لە سێ گەنج کرد و لە ئەنجامدا دووانیان گیانیان لەدەستدا و کەسێکی دیکەیان بریندار بوو؛ دەستبەجێ لێکۆڵینەوە لە رووداوەکە دەستی پێکرد.
وتیشی، دوای هەڵگرتنەوەی
دیمەنەکانی کامێرای چاودێریی شوێنی رووداوەکە و وەرگرتنی وتەی شایەتحاڵانی رووداوەکە،
توانرا بکوژی رووداوەکە دیاریی بکرێت.
دەشڵێت،
مەفرەزەکانیان لە بەشی پۆلیسی ناوشار، بنکەی پۆلیسی هەڵەبجە بەشی پۆلیسی نەهێشتنی
تاوان بەدواداچوونیان بۆ دەستگیرکردنی تۆمەتبار کرد و سەرئەنجام تۆمەتبار کە
تەمەنی ٢٢ دانیشتووی پارێزگای هەڵەبجەیە، خۆی رادەستی هێزەکانیان کردووە و
لەبەردەم دادوەری لێکۆڵینەوە دانی بەتاوانەکەدا ناوە.
ئاماژەی
بەوەشکرد، لە ئێستادا بە بڕیاری دادوەر و بەپێی ماددەی ٤٠٦ لە یاسای سزادانی
عێراقی راگیراوە و لێکۆڵینەوەکان بەردەوامن.