لە کۆبوونەوەی کۆتایی ئەنجومەنی ئاسایشی نەتەوە یەکگرتووەکاندا سەبارەت بە دۆخی عێراق، جێنین پلاسخارت نێردەی نەتەوەیەکگرتووەکان لە عێراق ئاماژەی بەوەکرد، "ئەنجامنەدانی هەڵبژاردنەکانی هەرێم لەکاتی خۆیداباجی قورسی دەبێت."

شوان محەمەد نوسەر و رۆژنامەنووس، دەڵێت "پێویستە ئەم قسانەی پلاسخارت بەهەند وەربگیرێت بەڵام بەداخەوە، بە درێژایی حوکمی یەکێتی و پارتی قۆرخی دەسەڵاتیان کردووە و ئامادەی ئەنجامدانی هەڵبژاردن نین و ئەم سیستمە سیستمێکی داپڵۆسێنەرە."

ئیسماعیل نامیق کە مامۆستای زانکۆیە دەڵێت، "پێویستە خۆمان وەک میللەتی کورد بەرهەڵستی بکەین و بێدەنگ نەبین وڵاتانی ئەوروپا و ئەمریکا و کۆمەڵگەی نیودەوڵەتی پشتیوانی ئێمەن، نابن بەڕێبەرمان پێویستە خۆمان ڕێبەر هەڵبژێرین."

ئیسماعیل نامیق وتیشی، "پێویستە حزبە ئۆپۆزسیۆنەکان لەپرسی بابەتی درێژکردنەوەی ماوەی پەرلەماندا یەکدەنگبن و سەرجەم خاڵە جیاوازەکانی نێوانیان لەبیر بکەن و هەڵوێست و بەیاننامە و کاری هاوبەشیان هەبێ و دژی بوەستنەوە ئەوکات کۆمەڵگەی نێودەوڵەتی و خەڵکی ناڕازی دیکەش پشتگیری دەکەن چونکە ئەمە بابەتێکە پەیوەستە بە پرسی دیموکراسی و حوکمڕانی لە هەرێمی کوردستان و ناکرێت پشتگوێ بخرێت."

شوان محەمەد باسی لەوەشکرد، یەکێتی و پارتی دەترسن لەوەی دەسەڵاتەکەیان لەبەردەم روودانی بوومەلەرزەیەکی گەورەدایە بۆیە لە دیموکراسی دەترسن و وڵات بە شێوەی پۆلیسی و سەربازی بەڕێوەدەبەن و راشیگەیاند، ئەم دەسەڵاتە تەنها نوێنەرایەتی ١٩٪ی خەڵکی هەرێمی کوردستان دەکات کە کەمینەی خەڵکی کوردستانن بۆیە دەترسن."