سەردێڕ:

شارەزایەکی بواری کەشناسی ئەو ناوچانەی ئاشکرا کرد کە خۆڵبارینی چڕ روویان تێدەکات

PM:09:57:20/06/2022

18976 جار خوێندراوەتەوە

شارەزایەکی بواری کەشناسی عێراق رایگەیاند، بەرەبەیانی رۆژی چوارشەممە کاتژمێر ٦ بۆ ٨ لە شاری بەغدا ماوەی چڕترین خۆڵبارین دەبێت و لە شاری ئەنباریش لە نێوان کاتژمێر ٤ بۆ ٦ی بەیانی دەبێت.


ئەمڕۆ دووشەممە، سادق عەتییە شارەزای بواری کەشناسی لە فەیسبووکی خۆی بڵاویکردەوە، شەوی سێشەممە و رۆژی چوارشەممە شەپۆلێکی خۆڵبارین روو لە عێراق دەکات.

دەشڵێت، ئێوارەی رۆژین سێشەممە لە خۆرئاوای پارێزگای ئەنبارەوە خۆكبارینێکی مامناوەند کە دواتر دەگۆڕێت بۆ چڕ روو لە عێراق دەکات و شەوی سیشەممە یان بەرەبیانی چوارشەممە دەگاتە هەر دوو پارێزگای سەلاحەدین و بەغدا.

ئەوەشی خستووەتەڕوو، دواتر لە بەرەبەیانی رۆژی چوارشەممە کاریگەری خۆڵبارینەکە دەگاتە شارەکانی فوراتی ناوەڕاست و روودەکات شارەکانی باشور و بیابانەکانی باشور، بەڵام کاریگەرییەکەی کەمتردەبێت.

لە بەشێکی دیکەی راگەیەنراوەکەیدا ئاماژەی بەوەشداوە، چڕترین شەپۆلی خۆڵبارینەکەبەرەبەیانی رۆژی چوارشەممە کاتژمێر ٦ بۆ ٨ لە شاری بەغدا دەبێت و لە شاری ئەنباریش لە نێوان کاتژمێر ٤ بۆ ٦ی بەیانی دەبێت.

باسی لەوەشکردووە، لە شارەکانی فوراتی ناوەڕاست چڕترین کاتەکانی خۆڵبارینەکە لە نێوان کاتژمێر ٧ بۆ ٩ی بەیانی دەبێت و لە شارەکانی باشوریش کاریگەرییەکەی لە نێوان کاتژمێر ٣ بۆ ٥ی ئێوارە دەبێت.

ئەمە لەکاتێکدایە، ئەمڕۆ دەستەی کەشناسی عێراق راگەیەنراوێکی بڵاوکردەوە و تیایدا هاتووە، دوانیوەڕۆی سبەینێ سێشەممە رێکەوتی ٢١ی ٦ی ٢٠٢٢ شەپۆلێکی توندی خۆڵبارین لە خۆرئاوای وڵاتەوە هەڵدەکات و ناوچەکانی تکریت و بێجی و عەننە دەگرێتەوە.

ئاماژەی بەوەشداوە، دواتر بەرەبەرە شەپۆلی خۆڵبارینەکە روو لە پارێزگاکانی هەولێر و کەرکوک و موسڵ و دیالە دەکات.













گەلەری