ئاماژەی بەوەشداوە، دووبارە بوونەوەی ئۆپراسیۆنە سەربازییەکانی تورکیا لە ناو سنوری خاکی عێراق و هەرێم و بەبێ هەماهەنگی کردن لەگەڵ حکومەتی فیدڕاڵی جێگەی قەبوڵنییە.

دەشڵێت، پێشتر چەندین جار داوایان لە تورکیا کردووە، بێ گفتوگۆ و هەماهەنگی کردن لەگەڵ حکومەتی فیدڕاڵدا تورکیا هیچ ئۆپراسیۆنێکی سەربازی ئەنجامنەدات.

لەبەشێکی دیکەی راگەیەنراوەکەدا هاتووە، "لەکاتێکدا پێداگری لەسەر بەهێزکردنی پەیوەندییەکانی نێوان هەردوو وڵات دەکەین لەسەر بنەمای بەرژەوەندی هاوبەش و چارەسەرکردنی دۆسیەی ئەمنی بە گفتوگۆ و هەماهەنگی هاوبەش، هەموو جۆرە کردەیەکی ئەمنی تاک لایەنانە بۆ چارەسەرکردنی کێشە هەڵواراوەکان رەتدەکەینەوە، هەربۆیە پێویستە رێزی سەروەری عێراق بگیرێت".

دەشڵێت، حکومەتی عێراق بەهەموو شێوەیەک بەردەوام رەتی کردووەتەوە خاکەکەی ببێتە گۆڕەبانی ململانێ و یەکلایی کردنەوەی کێشەکان و هێرش کردنە سەر سەروەری عێراق و هەڕەشە بۆ سەر ئەمن و سەقامگیری ناوخۆیی وڵات. بەهەموو شێوەیەک رەتی دەکاتەوە خاکی عێراق ببێتە سەرچاوەی هەڕەشە و کاری دوژمنکارانە بۆ سەر هیچ کام لە دراوسێکانی.

لەلایەن خۆیەوە، ئەحمەد سەحاف وتەبێژی وەزارەتی دەرەوەی عێراق راگەیەنراوێکی بڵاوکردەوە و تیایدا هاتووە، کۆماری عێراق بەهەموو شێوەیەک ئۆپراسیۆنە سەربازییەکەی تورکیا لە هەرێم رەتدەکاتەوە و بەتوندی سەرکۆنەی دەکات.

ئاماژەی بەوەشداوە، بۆردومان کردنی ناوچەکانی مەتین و ئاڤاشین و باسیان و زاب لە هەرێمی کورستان لە رێگەی فڕۆکەی بێ فڕۆکەوانی ئاتاکەوە سەرکۆنە دەکات.

دەشڵێت، عێراق ئەم کردەیە بە پێشێلکردنی سەروەری و رێزی وڵات دادەنێت و هاوکات، پێچەوانەی بەڵگەنامە و یاسا نێودەوڵەتییەکان کە پەیوەندی نێوان وڵاتان رێکدەخات.

هەر بەگوێرەی راگەیەنراوەکە، ئەم هەنگاوەی تورکیا پێچەوانەیە لەگەڵ بنەمای باش مامەڵەکردنی وڵاتانی دراوسێ کە پێویست دەکات پێکەوە بە هاوبەشی کاربەکن لە بواری ئەمنییدا بە ئامانجی خزمەتکردنی هەردوولا و دەبێت لەمەشدا پێداگری بکەن.

لەبەشێکی دیکەی راگەیەنراوەکەی وەزارەتی دەرەوەی عێراقدا هاتووە، حکومەتی عێراقی هەرگیز رێگەنادات خاکەکەی ببێتە پەناگە و رێڕەوی هیچ زیانگەیاندنێک بە هیچ کام لە دەوڵەتەکانی دراوسێی، هەروەک چۆن رەتیدەکاتەوە خاکەکەشی بکرێتە مەیدانی ململانێکان و یەکلایی کردنەوەی کێشەی لایەنەکان.

هەروەها، موقتەدا سەدر رێبەری رەوتی سەدر لە تویتێکیدا ئاماژەی بەوەدا، تورکیای دراوسێ بێ هیچ پاساوێک بۆردومانی خاکی عێراقی کردووە، ئەگەر هەڕەشەیەک هەیە بۆ سەری ئەوا پێویستە بە هەماهەنگی لەگەڵ حکومەتی عێراقدا کۆتایی پێبهێنێت، چونکە هێزە ئەمنییەکانی عێراق ئەو توانایەیان هەیە.

لەبەشێکی دیکەی پەیامەکەیدا دەڵێت، ئەگەر ئەمە جارێکی دیکە دووبارە بێتەوە بێدەنگ نابین، چونکە عێراق وڵاتێکی خاوەن سەروەریی تەواوە و هیچ دەستدرێژی کردن و تێکدانی دۆخی ئەمنی قەبوڵ ناکات. هەروەکچۆن هیچ هێرش و دوژمنکاریەکیش بۆ سەر هیچ وڵاتێکی دراوسێشی قەبوڵناکات.

لەکۆتایی پەیامەکەی موقتەدا سەردا هاتووە، هەرکەس خوازیارە پەیوەندییەکانمان بەهێزبێت و هاوسنەگی لەگەڵ وڵاتانی دراوسێ بپارێزێت، ئەوا بەهەمان شێووەی دبلۆماسی مامەڵەی لەگەڵ دەکرێت، ئەمەش بەمەبەستی بەرکارکردنی مامەڵە دبلۆماسییەکان.

لەلایەن خۆشییەوە، عەمار حەکیم سەرۆکی رەوتی حیکمە لە راگەیەنراوێکیدا ئاشکرای کرد، "لەکاتێکدا داوا لە حکومەتی عێراق دەکەین سنورەکانی بپارێزێت و رێگەنەدات ببێتە هەڕەشە بۆ سەر هیچ لایەنێک و ببێتە گۆڕەپانی هێرش کردن بۆسەر وڵاتانی دراوسێ، ئەوا داوا لە وڵاتانی دراوسێش دەکەین رێزی سەروەریی عێراق بگرن و هیچ ئۆپراسیۆنێکی سەربازی لە خاکەکەیدا ئەنجام نەدات".

دەشڵێت، بەهەموو شێوەیەک ئۆپراسیۆنە سەربازییەکەی تورکیا لە هەرێم رەتدەکەینەوە.

ئەمە لەکاتێکدایە، بەرەبەیانی دوێنێ وەزارەتی بەرگری تورکیا دەستپێکردنی ئۆپراسیۆنەکانی "کلیل چنگ"ی لە هەرێمی کوردستان دەستپێکرد و بە فڕۆکەی بێفڕۆکەوان لە جۆری ئاتاک ناوچەکانی شێلادزێ و مەتین و ئاڤاشین و زابی بۆردوومان کرد و راشیگەیاند، تا دوا ئامانجی پلان بۆدانراوی خۆیان بەگوێرەی پلانی ستراتیجی سەربازییان لە ئۆپراسیۆنەکانیان بەردەوام دەبن.

هاوکات، تا ئێستا هەر سێ سەرۆکایەتی هەرێم و پەرلەمان و حکومەتی هەرێمی کوردستان بەرامبەر هێرشەکانی تورکیا بێدەنگییان هەڵبژاردووە و هیچ هەڵوێست و کاردانەوەیەکی فەرمییان نەبووە.