PM:09:37:09/09/2025
552 جار خوێندراوەتەوە
+
-
ئەلکاراز چووە پێشەنگی ریزبەندی و سینەر
دابەزی بۆ پلەی دووەم و سابالێنکاش پێشەنگی کچانە.
یەکێتی یاریزانە پیشەگەرەکانی تێنسی
سەرزەوی نوێترین ریزبەندی بڵاوکردەوە دوای تەواو بوونی جامی ئەمریکای کراوە و
گەورەترین گۆڕانکاری لە ریزبەندییەکەدا بینرا.
کارلۆس ئەلکارازی ئیسپانی دوای ئەوەی بووە
پاڵەوانی جامی ئەمریکای کراوە چووە پێشەنگی ریزبەندی بە کۆکردنەوەی 11 هەزار و 540
خاڵ، یانیک سینەری ئیتاڵیش دابەزی بۆ پلەی دووەم.
ئەلیکساندەر زڤیرێڤی ئەڵمانیش لە پلەی
سێیەمی ریزبەندییەکەدا مایەوە و نۆڤاک جۆکۆڤیچ سێ پلە چووە پێشەوە و ئێستا بە
کۆکردنەوەی چوار هەزار و 830 خاڵ لە پلەی چوارەمدایە.
هەریەکە لە تایلۆر فرێتز و بین شیلتۆنی
ئەمریکی و جاک دراپەری بەڕیتانی و دی مینۆری ئوستراڵی لە پلەکانی پێنجەم تا
هەشتەمی ریزبەندی یاریزانانی تێنسی سەرزەویدا دەبینرێن.
لەسەر ئاستی کچانیش، ئارینا سابالێنکای
بیلاڕوسی پارێزگاری لە پێشەنگی ریزبەندی جیهان کرد و شیفۆنتیک و کۆکۆ گاوف لە
پلەکانی دووەم و سێیەمدا مانەوە، ئەنیسیمۆڤا چووە پلەی چوارەمی ریزبەندی.