AM:09:30:15/09/2026
264 جار خوێندراوەتەوە
سوپای پاسدارانی ئێران رایگەیاند، سیستەمی بەرگریی ئاسمانیی سەر بە هێزی ئاسمانی و بۆشایی سوپاکەیان توانیویەتی بەرەبەیانی ئەمڕۆ لە ئاسمانی رۆژئاوای گەرووی هورمز، درۆنێکی پێشکەوتووی ئەمریکی لە جۆری MQ1 دەستنیشان بکات و بیخاتە خوارەوە.
ئەمڕۆ سێشەممە ١٥ـی ئەیلوولی ٢٠٢٦، بەگوێرەی راگەیەندراوەکەی سوپای پاسداران، ئۆپەراسیۆنی خستنەخوارەوەی فڕۆکە بێفڕۆکەوانەکە لەژێر سەرپەرشتی و کۆنترۆڵی تۆڕی یەکگرتووی بەرگریی ئاسمانیی ئێراندا ئەنجامدراوە.
لە بەشێکی
دیکەی لێدوانەکانیدا، سوپای پاسداران ئاماژەی بە رووداوێکی دیکەی ناوچەکە کردووە و
رایگەیاندووە، نەوتهەڵگری "ئێل گایا" هەوڵیداوە لە رێڕەوی نایاسایی و
قەدەغەکراوی باشووری گەرووی هورمزەوە تێپەڕبێت، بەوهۆیەوە بەر مینێکی دەریایی
کەوتووە و گڕی گرتووە؛ جەختیشیکردووەتەوە کە سەرەڕای هەوڵەکان ئاگرەکە کۆنترۆڵ
نەکراوە و تەواوی تانکەرەکەی گرتووەتەوە.
سوپای پاسداران وێڕای بیرهێنانەوەی هۆشدارییەکانی پێشووی سەبارەت بە
مەترسیی تێپەڕین لەو رێڕەوە، راشیگەیاند کە لە ئێستادا گەرووی هورمز بە تەواوی
داخراوە و لەژێر کۆنترۆڵی هێزەکانی ئێراندایە.
لە بەرامبەردا، فەرماندەیی ناوەندیی هێزەکانی ئەمریکا "سێنتکۆم" قسەکانی
ئێرانی رەتکردووەتەوە و دەڵێت، ئەو نەوتهەڵگرە بەهۆی مینەوە ئاگری نەگرتووە، بەڵکو
لەلایەن ئێرانەوە بە درۆن و مووشەک هێرشی کراوەتە سەر و پێکراوە.
