خەزعلی ئاماژەی بەوەش کرد، کۆکردنەوەی چەک لەلایەن دەوڵەتەوە داخوازییەکی رەوا و دروستە بۆ جێگیربوونی دامەزراوە ئەمنییەکان، هەروەها روونی کردەوە، سەرکردە سیاسییەکانی شیعه لە هەمووان زیاتر پەرۆشی جێبەجێکردنی ئەم پرۆسەیەن، کە بە وتەی ئەو، گواستنەوەی چەک بۆ ناو دامەزراوەکانی دەوڵەت بە کردار ئەنجامدراوە نهک تەنها بە رووکەش.

لەبارەی هۆکارەکانی بوونی چەک لە دەرەوەی دەسەڵاتی دەوڵەت، ئاماژەی بەوەدا، ئەم دیاردەیە پەیوەست بووە بە بارودۆخی داگیرکاری و شەڕی داعشەوە، سەرکەوتنی ئەم پرۆسەیەش پێویستی بە چارەسەرکردنی هۆکارە بنەڕەتییەکان هەیە.

سەبارەت بە بارودۆخی ئێرانیش، خەزعلی هۆشداریدا، رووخانی رژێم لە ئێران کاریگەرییەکانی تەنها لەناوخۆی ئەو وڵاتە نامێنێتەوە بەڵکو تەواوی ناوچەکە دەگرێتەوە، وتیشی، هەڵوێستی عێراق بەرامبەر ئێران لە هەڵوێستی مەرجەعییەت و حکومەت و گەلدا رەنگی داوەتەوە.

هاوکات روونیکردەوە، پۆستی جێگری سەرۆکی وەزیران بووەتە جێی ململانێی نێوان پارتی دیموکراتی کوردستان و یەکێتیی نیشتمانیی کوردستان، و لەناو پێکهاتەی سونەشدا ئاستەنگ لەسەر پڕکردنەوەی وەزارەتی رۆشنبیری هەڵگیراوە.