لە کۆتایی کۆبوونەوەکەدا راگەیێندراوێکی هاوبەشیان بڵاوکردەوە، تێیدا هەردوولا ئامادەیی تەواویان دەربڕی بۆ پێکهێنانی کابینەی نوێی حکومەتی هەرێمی کوردستان لەسەر بنەمای ئیستحقاقی هەڵبژاردن، بە جۆرێک حکومەتەکە هاوسەنگ بێت و لەسەر ئاستی ناوخۆ و عێراق و کۆمەڵگەی نێودەوڵەتیی پەسەندکراو بێت، هەروەها هەڵگری چارەسەری بنەڕەتی بێت بۆ کێشە هەڵپەسێردراوەکانی نێوان هەولێر و بەغدا.

لە بەشێکی تری راگەیەندراوەکەدا هۆشدارییەکی تووندیاندا بە ئەوانەی ئاستەنگ بۆ پێکهێنانی حکومەت دروست دەکەن و دەڵێن، پێکنەهێنانی حکومەت راستەوخۆ بەستراوەتەوە بە ژیان و گوزەران و داهاتووی هەرێمی کوردستانەوە، بۆیە هەر لایەنێک ببێتە هۆکاری بەربەست لە پێکنەهێنانی حکومەت، بە تەواوی بەرپەرسیار دەبێت بەرامبەر بە خەڵکی کوردستان و هەر رووداوێک کە لە داهاتوودا رووبدات.

لە کۆتاییدا، هەردوو لایەن جەختیان کردەوە، بۆ کۆتاییهێنان بەم دۆخە نەخوازراوەی ئێستا و بەدیهێنانی خۆشگوزەرانی، هەموو رێگەیەکی چارەسەر دەگرنە بەر، هاوکات رایانگەیاند، دەرگای گفتوگۆی هاوپەیمانێتییەکەیان کراوەیە بەرامبەر سەرجەم لایەنەکان، بەڵام بەپێی ئەو واقیعە سیاسییە نوێیەی کە لە هەرێمی کوردستاندا هاتووەتە ئاراوە.