هاوکات دەستەکە داواى کردووە ڕێکارێکى یەکگرتوو و یاسایی هەبێت بۆ کۆکردنەوەی باجی خاوەن پیشەکان، ڕیکلام و تێچووی کۆکردنەوەی زبڵ و خاشاک، بەپێی یاسای کۆکردنەوەی قەرزە حکومییەکان، نەک بەکارهێنانی ڕێکاری نایاسایی وەک مۆرکردنی دوکانەکان یان دانانی بلۆکی کۆنکرێتی.

ئاماژە بەوەشکراوە، پێشنیاز کراوە پلاتفۆرمێکی ئەلیکترۆنی یەکگرتوو درووست بکرێت تاوەکو باجدەران بتوانن زانیاری لەسەر بڕی باج، قەرز و ئەوەی داویانە وەربگرن، بەهۆی ناڕوونی لە بنەمای هەژمارکردنی هەندێک باج و کەمیی زانیاری هاوڵاتییان لەسەر ئەو بڕە پاره‌یەی کە لەسەریانە.

هاوکات پێشنیازیش کراوە مۆڵەت نەدرێت یان نوێ نەکرێتەوە شوێنەکانى گەشتوگوزار، هۆتێل، بانک، کۆمپانیاکانی ئاڵوگۆڕی دراو، نەخۆشخانە و کلینیکە تایبەتەکان، زێڕنگەرەکان، وێستگەکانی سووتەمەنی و موەلیدەکان، تا دوای هێنانی ئەستۆپاکی لە فەرمانگەکانی ئەمانەتی بەغداد.

ئەوەش خراوەتەڕوو، تا ئێستاش کار بە خەمڵاندنی پیشە و کارەکانی ئەمانەتی بەغدادی ساڵی ٢٠١٨ دەکرێت، داوا کراوە نوێ بكرێنەوە بەجۆرێک لەگەڵ گۆڕانکارییە ئابوورییەکاندا بگونجێت، بۆ زیادکردنی سەرچاوەکانی داهات دەوڵەت.