دەستەی دەستپاکیی عێراق ئاماری چالاکییەکانی مانگی ڕابردووی بڵاوکردەوە و ڕایگەیاند، تەنها لە مانگی رابردوودا ٢٧ فەرمانی دەستگیرکردن بۆ بەرپرسانی باڵا دەرچووە و ١٩١ پڕۆسەی پشکنین و دەستبەسەرداگرتنیش ئەنجام دراوە.
ئەمڕۆ یەکشەممە ٦ـی ئەیلوولی ٢٠٢٦، دەستەی دەستپاکیی عێراق لە ڕاگەیەنراوێکدا ئاماری کار و چالاکییەکانی مانگی ئابی ٢٠٢٦ـی بڵاوکردەوە، بەپێی ئامارەکان، لەو مانگەدا ٢٧ فەرمانی گرتن و بانگهێشتکردنی دادوەری بۆ ئەو بەرپرسانە دەرچووە کە خاوەن "پلەی تایبەت"ـن.
هەر لەو مانگەدا،
دەستەی دەستپاکی ١٩١ پڕۆسەی پشکنین و دەستبەسەرداگرتنی ئەنجام داوە و توانیویەتی ٧٨
تۆمەتبار لە کاتی ئەنجامدانی تاواندا دەستگیر بکات، هەروەها دادگاکان ٧٥ بڕیاری
سزادانیان دەرکردووە و لەو چوارچێوەیەدا ٨١ کەس بە سزای جۆراوجۆر سزادراون.
سەبارەت بە گەڕاندنەوەی
پارە دزراوەکان، دەستەکە ئاشکرای کردووە کە ٥٣ دۆسیەی تایبەت بە وەرگرتنەوەی تۆمەتبارانی
هەڵاتوو و پارە قاچاخبراوەکانیان بۆ دەرەوەی وڵات ئامادە کردووە.
لە لایەکی دیکەوە،
سێ هەزار و ٤٤٩ فۆرمی ئاشکراکردنی دارایی لە لایەن فەرمانبەر و بەرپرسانەوە گەڕێندراونەتەوە
و تێیدا دەرکەوتووە کە ١١ کەسیان بەرژەوەندییەکانیان لەگەڵ کارەکەیان تێکەڵ کردووە.
لە راگەیەندراوەکەدا هاتووە، لە پێناو چاودێریکردنی
دامەزراوەکان، تیمەکانی دەستەی دەستپاکی ٧١ سەردانی مەیدانییان بۆ فەرمانگەکانی دەوڵەت
ئەنجام داوە و سێ ڕاپۆرتی تایبەتیان دەربارەی کێشە و ئاستەنگەکانی بەردەم ڕاپەڕاندنی
کارەکان ئامادە کردووە.