لازۆ ئەحمەد، لە سەرناوی دەرچووانی دانەمەزراو ڕایگەیاند، ئێمە وەکو دەرچووە سێ یەکەمەکانی زانکۆ و پەیمانگاکانی هەرێم دوای ئەوەی ٤٧ جار خۆپیشاندانی ئاشتیی و هێمانەمان ئەنجام داوە و نۆ ساڵە چاوەڕوانی دامەزراندنین، کە بە فەرمانی سەرۆکی حکومەت بایۆمەتریمان ئەنجام داوە و تەنها دوا واژووی خۆی ماوە بۆ دامەزراندنی ئێمە.

وتیشی، نۆ ساڵە مافمان دەخورێت و لە چاوەڕوانیداین، هەر ساڵێک بە بیانوویەک ڕاماندەگرن، دەمانەوێت وەکو دەستەی نوێنەرانی سەرجەم سێ یەکەمەکانی زانکۆ و پەیمانگاکان بۆ هەموو لایەکی ڕوون بکەینەوە، دوای کۆبوونەوە و قسەکردنمان لەگەڵ سەرۆکی ئەنجومەنی ڕاژە و بەڕێوەبەری بودجەی هەرێمی هەرێمی کوردستان و لایەنە پەیوەندیدارەکان بەگشتیی و بەشێک فراکسیۆنەکانی ئەنجومەنی نوێنەرانی عێراق و زۆربەی ئەندامە کوردەکانی خۆمان لە پەرلەمانی عێراق، کە هیچ لایەنێک نییە نەڵێت ئەمە مافی خۆتانە، سەرباری ئەوەی بە پێی یاسای ژمارە (١٠) بڕگەی (٢٥)ـی ساڵی (٢٠٠٨)ـی هەرێمی کوردستان و مادەی ٦٧ـی ساڵی ٢٠١٧ـی پەرلەمانی عێراق، پێویستە ئێمە دوای دەرچوونمان ڕاستەوخۆ هاوشێوەی یەکەمەکانی عێراق دابمەزرێین، نەک نۆ ساڵ چاوەڕوان بین و دەستی دەستیمان پێبکەن.

هەروەها، دەمانەوێت ئەوە بۆ هەموو لایەک ڕوون بکەینەوە، کە دانەمەزراندنمان جگە لەوەی کەمتەرخەمی هەرێمی کوردستانە، لە ئێستادا لەسەر شانی شاندی دارایی هەرێم و سەرجەم ئەندامانی کوردی پەرلەمانی عێراق دەکەوێت، بۆیە تکا دەکەین بە هەمووتانەوە کۆتایی بەم چاوەڕوانییە تراژیدییە بهێنن و پێداگری بکەن لەسەر مافی کورد و ئێمەی یەکەمەکان و ئایندەی دکتۆر و پرۆفیسۆرەکانی زانکۆ و پەیمانگاکانی هەرێمی کوردستان.