PM:03:25:05/09/2026
1176 جار خوێندراوەتەوە
عەلی زەیدی و نوری مالیکی کۆبوونەوە و تاوتوێی بارودۆخی گشتیی وڵات و ژمارەیەک دۆسیەی سیاسییان کرد، و جەختیان کردەوە لەسەر گرنگی پاڵپشتیکردنی هەوڵەکانی حکومت لە بەرەنگاربوونەوەی گەندەڵی و چاکسازیی ئابووری و کارگێڕی و تەواوکردنی کابینەی حکومەت.
ئەمڕۆ شەممە ٥ـی ئەیلوولی ٢٠٢٦، نووسینگەی سەرۆك وەزیرانی عێراق بڵاویكردەوە، لەو كۆبوونەوەیەدا كە لە نووسینگەی نوری مالیكی بەڕێوەچوو، باس لە نوێترین پێشهاتە سیاسی و ئەمنییەكان لەعیراقدا كراوە، هەروەها گفتوگۆ لەسەر ئەو ئاڵنگاریانە كراوە كە دێنە بەردەم پرۆسەی سیاسی و هەنگاوەكانی پاراستنی بەرژەوەندی نیشتمانی.
ئاماژە بەوەشکراوە، هەردوولا جەختیان لەسەر بەردەوامی هەوڵە سیاسییەكان کردەوە
بەجۆرێك سەقامگیری زیاتر بێنێتە ئاراوە، لەگەڵ یەكخستنی هەڵوێستەكان لەبوارە جیاجیاكاندا.
وەك لە راگەیەندراوەكەدا هاتووە، زەیدی و مالیکی دووپاتیان کردەوە لە خێراتركردنی
هەنگاوەكانی تەواوكردنی كابینەی حكومەتی عێراق تا گەرەنتی ئەوە بكرێت دامەزراوەكانی
دەوڵەت بەباشترین شێوە ئەركەكانیان جێبەجێ بكەن و ڕێگە خۆشكەر بێت لەبەردەم حكومەت
بۆ چۆنییەتی مامەڵە كردن لەگەڵ دۆسێ سیاسی، ئەمنی و ئابورییەكان، لەسەر بنەمای
سازان و هاوبەشی و بەرپرسارێتی نیشتمانی.
هەر لەو دیدارەدا نوری مالیكی، سەرۆكی هاوپەیمانی دەوڵەتی یاسا جەختیكرد لە
گرنگی لەبەرچاوگرتنی بەرژەوەندی نیشتمانی، پشتیوانیكردنی سیاسی لەحكومەتی عێراق و
كاركردن بە ڕۆحییەتی هەماهەنگی لەنێوان هێزە سیاسییەكاندا.
