ئاماژەی بۆ ئەوەش کرد، بە نوێنەرایەتیی حکومەتی هەرێمی کوردستان بەشداریی لە کۆبوونەوەی ئەم هەفتەیەی ئەنجومەنی وەزیرانی عێراقدا کردووە و یاداشتێکی فەرمیی پێشکەش کردووە، کە تێیدا رەزامەندیی هەرێم بۆ جێبەجێکردنی سیستمی گومرگی (ئەسیکۆدا) خستووەتەڕوو.

روونیشی کردەوە، بەپێی ئەم بڕیارە پێناس و رێکارە گومرگییەکانی نێوان هەرێم و بەغدا یەکدەخرێن، ئەمەش لە کاتێکدایە کە پێشتر دوو پێناس و رێکاری جیاواز جێبەجێ دەکران. هاوکات یاسا و رێنماییە بازرگانییەکان هاوتا دەکرێن و داتا و زانیارییەکانی هەردوولا هاوبەشییان پێدەکرێت.

وتیشی، خاڵی سەرەکی و ناکۆکیی ئێستا کە هێشتا یەکلایی نەکراوەتەوە، بریتییە لە میکانیزمی دابەشکردنی داهاتی دەروازە سنووریییەکانی هەرێمی کوردستان، کە بۆ ئەو مەبەستە هەرێم پێشنیازی خۆی رادەستی حکومەتی فیدراڵ کردووە.

لە کۆتاییدا جەختی لەسەر پێویستیی خێراکردنی پرۆسەکە کردەوە و ئاشکرایکرد، دواخستنی جێبەجێکردنی سیستمی ئەسیکۆدا لە دەروازەکانی هەرێم زیانێکی زۆری دارایی گەیاندووە و بووەتە هۆی کەمبوونەوەی داهات بە رێژەی ٧٨٪، لە کاتێکدا لە حکومەتی فیدراڵ دوای جێبەجێکردنی هەمان سیستەم داهاتی گومرگ بە رێژەی ١١٤٪ زیادیکردووە.