هەروەها جەخت دەکاتەوە لەسەر داوای فراکسیۆنەکەیان، لیژنەی نەوت و غازی عێراق کار بۆ چارەسەرکردنی قەیرانی بەنزین دەکات، لە کاتێکدا لایەنەکانی تر تەنها لە تۆڕە کۆمەڵایەتییەکانەوە قسە دەکەن.

شاسوار عەبدولواحید، سەرۆکی جوڵانەوەی نەوەی نوێ ڕایگەیاند، "ئەوەی ئەم حکومەتە بە خەڵکی دەکات ئەوپەڕی نابەرپرسیاریی و نائەخلاقییە، ئێستا بەغدا مووچە دەنێرێت، بەڵام حکومەتی ماوەبەسەرچوو کێشەی تر دروست دەکات تاوەکو خەڵک لە دڵەڕاوکێ و مەینەتیدا بهێڵێتەوە."

وتیشی، "هەتا ئەم حکومەتە ماوەبەسەرچووە نەرووخێنین واز ناهێنین، جا لە ڕێگەی دادگای فیدراڵییەوە بێت یان لە ڕێگەی هەر ڕێگەیەکی ترەوە، چونکە ئەم حکومەتە بووەتە هۆی بارگرانی و مەینەتی بۆ خەڵکی کوردستان."

دەشڵێت، "کوان ئەو هێزانەی تر کە بە خۆیان دەڵێن ئۆپۆزسیۆن و پێشتر ڕەخنەیان لە ئێمە دەگرت؟ ئەوان تەنها لە تۆڕە کۆمەڵایەتییەکانەوە قسە دەکەن؛ ئەگەر ئۆپۆزسیۆنبوون تەنها قسەکردن بێت لە تۆڕە کۆمەڵایەتییەکان، خەڵک توندتر لەوان قسە دەکات. ئەوانەی ڕۆژگارێک قسەیان بە ئێمە دەوت، جگە لە قسە یەک هەنگاو یان کرداریان نییە."

باسی لەوەشکرد، "ئەو کاتەی دەمانوت ئۆپۆزسیۆنین، خۆپێشاندانمان دەکرد و بەنزینمان دابەش دەکرد و نرخەکیمان بۆ ٦٥٠ دینار دابەزاند. ئێستاش سروە عەبدولواحید وەک وەزیرێک لە بەغدا شەو و ڕۆژ لە هەوڵدایە، و لەسەر داوای فراکسیۆنەکەمان لە بەغدا لیژنەی نەوت و غازی عێراق کێشەی بەنزین چارەسەر دەکات."