دوای دانوستانەکانی سعودییە و ئەمریکا لە ریازی پایتەخت، کە لە کۆشکی یەمامە دەستیپێکرد، شازادەی جێنشینی سعودیە و سەرۆکی ئەمریکا، بەڵگەنامەی هاوبەشی ئابووریی ستراتیژییان واژۆ کرد.
ئەمڕۆ سێشەممە ١٣ـی ئایاری ٢٠٢٥، لە دانوستانەکانی سعودییە و ئەمریکا لە ریازی پایتەخت، محەمەد بن سەلمان، شازادەی جێنشینی سعودییە و دۆناڵد ترەمپ، سەرۆکی ئەمریکا بەڵگەنامەی هاوبەشی ئابووریی ستراتیژییان واژۆ کرد و پێش واژۆکردنی بەڵگەنامەکە، کۆمەڵێک پرسی هاوبەشیان تاوتوێ کرد.
هەروەها، کۆشکی
سپیش رایگەیاند، سعودییە و ئەمریکا رێککەوتنێکی سەربازییان بە بەهای ١٤٢ ملیار
دۆلار واژۆکرد کە گەورەترین رێککەوتنە لە مێژوودا.
ئاماژەی
بەوەشکرد، ئەمریکا و سعودییە گەورەترین رێککەوتنی سەربازیی و بەرگرییان لە مێژوودا
واژۆ کرد، بۆ ئەوەی سعودییە بە سیستەمی بەرگریی پێشکەوتوو دەوڵەمەند بکرێت.
هاوکات،
رێککەوتنەکە پەرەپێدانی هێزی ئاسمانی، بەرگریی ئاسمانی و مووشەکی، ئاسایشی دەریایی
لەخۆ دەگرێت، پەرەش بە ئاسایشی وزە، پیشەسازیی و بەرگریی، تەکنەلۆژیای پێشکەوتوو
دەدات.
ئەوەش لە کاتێکدایە، ئەمڕۆ
سەرۆکی ئەمریکا بە فڕۆکەیەکی سەرۆکایەتیی وڵاتەکەی گەیشتە وڵاتی سعودییە و لە
لایەن، شازادەی جێنشینی سعودییەوە پێشوازی لێکراو بڕیارە دوای ئەویش سەردانی هەر
یەکە لە وڵاتەکانی قەتەر و ئیمارات بکات.
ترەمپ لە کۆنگرەیەکی رۆژنامەوانیدا لە کۆشکی سپی پێش ئەوەی
بەرەو ریاز بەڕێبکەوێت وتی، سەردانەکەی بۆ ناوچەکە ئیمارات و قەتەریش دەگرێتەوە و
بە سەردانێکی مێژوویی وەسفکرد.