سەرۆکی کۆمەڵەی ئۆتیزم لە هەرێمی کوردستان رایگەیاند، لە هەرێمی کوردستان ناوەندێکی پرۆفیشناڵمان نییە بۆ منداڵانی ئۆتیزم و بەشێک لە رێکخراوەکانیش بە ناوی منداڵی ئۆتیزمەوە هاوکاری وەردەگرن و هیچ رۆڵێکشیان نییە.
ئەمڕۆ چوارشەممە ٢ـی نیسانی ٢٠٢٥، کەمال جەبار، سەرۆکی کۆمەڵەی ئۆتیزم لە هەرێمی کوردستان لە بەرنامەی تاوتوێی ئێن ئاڕ تیدا باسی لەوەکرد، بەپێی ئامارە نافەرمییەکان لە هەرێم نزیکەی چوار هەزار منداڵی ئۆتیزم هەیە.
ئاماژەی بەوەکرد، بەپێی ئامارەکان رێژەی
تووشبوون بە ئۆتیزم تا دێت زیاتر دەبێت و سەنتەرەکانی ئۆتیزمیش تەنها توانای ٢٠ لە
سەدی لە خۆگرتنی منداڵی ئۆتیزمی هەیە.
ئەوەشی خستەڕوو، لە هەرێمی کوردستان
ناوەندێکی پرۆفیشناڵمان نییە بۆ منداڵانی ئۆتیزم و بەشێک لە رێکخراوەکانیش بە ناوی
منداڵی ئۆتیزمەوە هاوکاری وەردەگرن و هیچ رۆڵێکشیان نییە.
هەر
ئەمڕۆ سەرۆکی کۆمەڵەی ئۆتیزمی کوردستان لە کۆنفرانسێکی رۆژنامەوانیدا رایگەیاند، سەرەڕای
هەوڵی بێوچانی کۆمەڵەکەیان، ئۆتیزم لە هەرێمی کوردستان ساڵ دوای ساڵ زیاتر دەبێت و هۆشداریش دەدات کە دوای ٢٠ ساڵی دیکە لە هەر ١٠ بۆ ١٥ منداڵێک لە کاتی لەدایکبوون، یەکێکیان
ئۆتیزمی دەبێت و بەوەش هەر ماڵێک منداڵێکی ئۆتیزمی تێدا دەبێت.
ئەوەش لە
کاتێکدایە، ٢ـی مانگی نیسان وەک رۆژی جیهانی ئۆتیزم دیاریکراوە، ئەمەش بە ئامانجی
بڵاوکردنەوەی هۆشداری لەبارەی نەخۆشی ئۆتیزم و باشترکردنی شێوازی ژیانی ئەو
کەسانەی بەدەست ئەم نەخۆشییەوە دەناڵێنن و لەساڵی ٢٠٠٨ـەوە نەتەوە یەکگرتووەکان
بەکۆی دەنگ رۆژی ٢ـی نیسانی بە رۆژی جیهانیی هۆشیاری ئۆتیزم ناساند، بۆ ئەوەی
منداڵانی تووشبووی ئۆتیزم وەک بەشێکی دانەبڕاوی کۆمەڵگە، لە ژیان بەردەوام بن.