بەپێی وەزارەتی پەروەردەی کۆریای باشوور، قەیرانی خێراتربوونی رێژەی لەدایکبوون لە کۆریای باشوور بەردەوامە، بڕیارە لە ساڵی ٢٠٢٥دا نزیکەی ٥٠ قوتابخانە لە سەرانسەری وڵاتدا دابخرێن، لەبەر ئەوەی خوێندکاری پێویست نییە لە قوتابخانەکاندا بخوێنن.
ئەمڕۆ چوارشەممە ٢٦ی شوباتی ٢٠٢٥، بەپێی داتاکانی وەزارەتی پەروەردەی کۆریای باشوور، ٤٩ قوتابخانەی سەرەتایی و ناوەندی و ئامادەیی لە ١٧ شار و پارێزگادا لە ساڵی ٢٠٢٥ دادەخرێن.
ئاماژەی بەوەشکرد، لە کۆی ٤٩ قوتابخانەکە، ٣٨ قوتابخانەی سەرەتایین، هاوکات
هەشت قوتابخانەی ناوەندی و سێ ئامادەیی دادەخرێن، بەپێی هەواڵێکی رۆژنامەی کۆریا هیرالد.
باسی لەوەشکرد، داتاکان دەریانخستووە کە ٪٨٨ی ئەو قوتابخانانەی کە دادەخرێن
لە ناوچە گوندنشینەکانن، ئەمەش بووەتە هۆی نیگەرانییەکی گەورە سەبارەت بە کەلێنی
خوێندن لە نێوان سیئۆلی پایتەخت و پارێزگاکانی دیکە لە سەرانسەری کۆریای باشوور.
ئەمە لەکاتێکدایە، ژمارەی داخستنی قوتابخانەکان بەهۆی کەمیی خوێندکارانەوە
بە شێوەیەکی بەردەوام لە زیادبووندایە و لە ساڵی ٢٠٢٣دا لە ٢٢ قوتابخانەوە بۆ ٣٣
قوتابخانە لە ساڵی ٢٠٢٤دا بەرزبووەتەوە.