ئاماژەی بەوەشکرد، کۆمپانیای هێڵی ئاسنی گشتی گرێبەستێکی راوێژکاری لەگەڵ کۆمپانیای پی تی ڤی ئیتاڵی واژۆکردووە بۆ ئامادەکردنی دیزاینی سەرەتایی بۆ هێڵەکانی ئاسنی عێراق و نۆژەنکردنەوەی، کە لە بەسڕە درێژدەبێتەوە بۆ بەغدا، پاشان موسڵ، دەگاتە رەبیعە، جگە لە ئامادەکردنی دیزاین بۆ هێڵی شەمەندەفەرێکی نوێی دوو قات کە پرد و پەڕینەوەکانی تێدابێت.

ئەوەشی خستەڕوو، سەبارەت بە تێپەڕبوونی شەمەندەفەرەکان لەناو شارەکاندا بەتایبەت لە بەغدا، هێڵێکی بازنەیی جێبەجێدەکرێت کە لە ناوچەی یوسفیە درێژدەبێتەوە، بەناوچەی پشتی فڕۆکەخانەوە تێدەپەڕێت بۆ ناوچەی تاجی، بۆ ئەوەی رێگە لە هێنانە ناوەوەی شەمەندەفەر لە ناوخۆی بەغدا دوور بکەوێتەوە، بۆ ئاسانکاری هاتوچۆی شەمەندەفەرەکان بە شێوەیەکی سەلامەت و بێ کێشە.

هەروەها باسی لە دیزاینی شەمەندەفەرە زیرەکەکانی داهاتوو کرد و وتی، ئەم شەمەندەفەرانە بەگوێرەی پەرەپێدانی تەکنەلۆژیای مرۆیی لە داهاتوودا پلانیان بۆ دادەنرێت، بەو پێیەی داواکارییەک کرا بۆ دیزاینکردنی شەمەندەفەرێک کە توانای دابینکردنی پێداویستییەکانی گواستنەوەی هەبێت دوای ٥٠ ساڵ، بە لەبەرچاوگرتنی ئەوەی کە ئەم شەمەندەفەرانە لەگەڵ ستانداردە ئەوروپییەکان دەگونجێن، بۆ ئەوەی بتوانن بەو رێگایەدا بجوڵێن کە عێراق بە ئەوروپا دەبەستێتەوە.