پێشتر سەرۆکی ڕوسیا، وتبووی، ئامادەیە گفتوگۆ لەگەڵ هەموو دەسەڵاتدارانی ئۆکرانیا بکات جگە لە سەرۆکی ئەو وڵاتە.

هەروەها لە بەرامبەردا، ڤۆڵۆدمێر زیلینیسکی سەرۆکی ئۆکرانیا لە کۆتا چاوپێکەوتنیدا لەگەڵ میدیاکانى بەریتانیا، ئامادەیی خۆی بۆ ئەوە دەربڕیوە لەگەڵ پوتینـی هاوشانی گفتوگۆ و دانووستان لەبارەی ئاگربەستەوە بکات.

هەرچى ئەمریکاشە، کە لایەنێکی گرنگی ناراستەوخۆی جەنگەکەیە، چەندین جار دۆناڵد ترەمپ سەرۆکى ئەو وڵاتەوە باسی لەوە کردووە، گفتوگۆ لەگەڵ بەرپرسانی هەردوولا دەکات و گەشبینە بەوەی کە جەنگەکە کۆتایی پێبهێنن. هاوکات یەکێک لەو بابەتانەش کە ترەمپ لەکاتی بانگەشەی هەڵبژاردندا بەڵێنی بەدیهێنانى دەدا کۆتاییهێنان بوو بەو جەنگە.

جەنگەکە کاولکاریی و قوربانیی زۆری لێکەوتووەتەوە و بەپێی کۆتا ئامارەکان ژمارەی قوربانیان لە یەک ملیۆن کەس نزیکبووەتەوە.

زیانە مادییەکان بەجۆرێکە تەنیا روسیا لەم جەنگەدا بەنزیکەیی ٢١١ ملیار دۆلاری لە جەنگەکەدا خەرجکردووە و زیانە ئابوورییەکانی ئۆکرانیاش بە درێژایی جەنگەکە گەیشتووەتە ٤١١ ملیار دۆلار.

کۆتا جار کە روسیا و ئۆکرانیا گفتوگۆیان لەسەر کۆتاییهێنان بە جەنگ کردبوو، ساڵی ٢٠٢٢ بوو، دانوستانەکانی ئەوکاتیش بێ ئەنجام بوون، بەڵام گۆڕانى سیاسەتی دەرەوەی ئەمریکا بە هاتنى ترەمپ و شەکەتبوونى هەردوو لایەنە سەرەکیەکەى جەنگەکە و کەڵەکەبوونی زیانە ئابووریەکانى هەردوو وڵات، رەنگە هەردوو وڵات ناچار بە سازشکردن بکات.