سه‌رۆكی وه‌زیرانی عێراق، جه‌خت له‌سه‌ر گرنگی هاوبه‌شی و یه‌كخستن له‌گه‌ڵ میسر ده‌كاته‌وه له رووبه‌ڕووبوونه‌وه‌ی ئاسته‌نگه ئابوورییه‌كان، دەشڵێت، زه‌مینه‌یه‌كی له‌بار هه‌یه بۆ هاوكاری و هاوبه‌شی و ئاڵوگۆڕی بازرگانی له نێوان هه‌ردوو وڵات.
ئەمڕۆ پێنجشەممە ٣٠ـی کانونی دووەمـی ٢٠٢٥، محه‌مه‌د شیاع سودانی، سه‌رۆكیوەزیرانی عێراق دوای کۆبوونەوەی له‌گه‌ڵ مسته‌فا مه‌دبول، سه‌رۆك وه‌زیرانی میسر له به‌غدا رایگه‌یاند، لیژنه‌ی هاوبه‌شی نێوان میسر و عێراق یه‌كێكه له سه‌ركه‌وتووترین لیژنه وه‌زارییه‌كان له به‌دواداچوون بۆ جێبه‌جێكردنی یاداشتنامه‌كانی لێكتێگه‌یشتن و لێكۆڵینه‌وه له بواره‌كانی هاریكاری فراوان.
وتیشی، پێشتر ١١ یاداشتنامه‌ی لێكتێگه‌یشتن
له‌نێوان عێراق و میسر له مانگی حوزەیرانی ٢٠٢٤ واژۆ كراون و ئه‌م هاوكارییه ئه‌مڕۆ
به واژۆكردنی ١٢ یاداشتنامه‌ی لێكتێگه‌یشتن له بواره جیاجیاكاندا به‌هێزتر بوو.
ئاماژه‌ی به‌وه‌شكرد، سه‌قامگیریی سیاسی و كۆمه‌ڵایه‌تی
له عێراق و دووركه‌وتنه‌وه له ناكۆكیه‌كان دوو هۆكاری سه‌ره‌كین بۆ گۆڕینی عێراق
بۆ ده‌رفه‌تێكی باش بۆ وه‌به‌رهێنان، جه‌ختی له‌وه كرده‌وه كه ژینگه‌ی سه‌رنجڕاكێشی
وه‌به‌رهێنان و یاساكانی پاڵپشتی كار و چاكسازی و په‌ره‌پێدانی بانكی و باج هه‌نگاوی
باش له‌به‌رچاو گیراو بوون بۆ ئه‌وه‌ی عێراق ببێته گۆڕه‌پانێكی گه‌شه‌پێدانی ئومێدبه‌خش.
ئه‌وه‌شی خسته‌ڕوو، لێكتێگه‌یشتنێك هه‌یه
له بواری گواستنه‌وه‌ی وشكانی له نێوان هه‌ردو وڵاتدا، له بواری بره‌ودان به كێبڕكێ
و به‌رنگاربوونه‌وەی قۆرخكاری، هه‌روه‌ها هه‌ماهه‌نگی له‌نێوان ئه‌میندارییه‌تی به‌غدا
و پارێزگای قاهیره.
باسی له‌وه‌شكرد، شێوازی چاكسازی حكومه‌ت وای
له كۆمپانیا میسرییه‌كان كرد به شێوه‌یه‌كی تایبه‌ت و فراوان بێنه ناو بازاڕی عێراقه‌وه،
زۆرێك له كۆمپانیا میسرییه‌كان سه‌رقاڵی جێبه‌جێكردنی چه‌ندین پڕۆژه‌ی ژێرخان و پڕۆژه‌ی
وه‌به‌رهێنانن، قه‌باره‌ی گرێبه‌سته‌كانیش له‌گه‌ڵ كۆمپانیا میسرییه‌كان بۆ جێبه‌جێكردنی
پڕۆژه‌كانی ژێرخانی زیاتر له (٦٠٠) ملیار دیناری عێراقی.