PM:10:32:29/01/2025
1904 جار خوێندراوەتەوە
حکومەتى عێراق بە بڕیارێک فڕۆکەخانەکانى عێراقى بەستەوە بە وەزارەتى گواستنەوەوە و ئەوەش وادەخوێندرێنەوە حکومەتەکەى سودانى دەیەوێت فڕۆکەخانەکان لە دەستى ئەنجومەنى هەندێک لە پارێزگاکان و حزبەکان دەربهێنێت و ئیدارەکەى ببەستێتەوە بە بەغداوە.
ئەمڕۆ چوارشەممە ٢٩ـی کانونی دووەمـی ٢٠٢٥، لە چوارەمین دانیشتنى ئەنجومەنى وەزیراندا لە ساڵى ٢٠٢٥، ئەنجومەنى وەزیرانى عێراق بڕیاریدا تەواوى بەڕێوەبردنى فڕۆکەخانەکان لە پاسپۆرت، گومرگ، تەندروستى ، ئاسایش، دەگەڕێتەوە بۆ ژێر دەسەڵاتى وەزارەتى دارایی عێراق، بڕیارەکەش وەک لێدانە لە دەسەڵاتى چەند پارێزگارێکى عێراق کە ئیدارەى فڕۆکەخانەکانیان بەستووەتەوە بە پارێزگار و ئاسایشى پارێزگاکەوە و جۆرێک لە سەربەخۆیان لە هاتووچۆدا دروستکردووە.
ئاماژە
بەوەشکرا، حکومەتى عێراق دەسەڵاتى ئەوەشیداوە بە وەزارەتى گواستنەوە لە واژۆکردنى
گرێبەست بۆ گەشەپێدان و فراوانکردنى فڕۆکەخانەکان و پێشخستنى لەگەڵ پێشکەوتنەکانى
بوارى فڕۆکەوانیدا.
هاوکات تازەترین
زانیارییەکان دەڵێن، فڕۆکەخانەکانى عێراق لەجیاتى ئەوەى ببنە سەرچاوەى پەیداکردنى
داهات، بەشێک لە داهاتى وڵاتیان تێدا خەرج دەکرێت و ئەوەش پەیوەندى بە
کۆنترۆڵکردنى فڕۆکەخانەکانەوە هەیە لەلایەن کۆمپانیاکان و دەسەڵاتە
لۆکاڵییەکانەوە، بۆیە بەغدا بەنیازە هاوشێوەى دەروازەکانى سنوور کۆنترۆڵى
فڕۆکەخانەکانیش بکاتەوە.
ئەوەش لە کاتێکدایە، حکومەتى عێراق لەپلانیدایە ئەمساڵ چوار فڕۆکەخانەى دیکە دروستبکات لە
موسڵ، ئەنبار و ناسرییە و نەجەف و تێکڕاش ببەسترێنەوە بە بەغدا و هیچ پارێزگایەک
راستەوخۆ نەتوانێت بەبێ گەڕانەوەى بۆ بەغدا ئیدارەى فڕۆکەخانەکان بکات و دەسەڵاتى
فڕۆکەوانى مەدەنى عێراق و وەزارەتى گواستنەوە بسەپێنێت بەسەر فڕۆکەخانەکاندا.
گۆران عەبدوڵا- بەغداد
