هاوکات، ئیسرائیل کاتز وەزیری بەرگریی ئیسرائیل دەڵێت، لە مانگی ١١ـی رابردووەوە، لە هەموو کاتێک زیاتر لە راگەیاندنی ئاگربەست نزیکن و هیوادارم  بەرەوپێشچوونی زیاتر هەبێت و بگەینە ئەنجام.

وەزیری بەرگریی ئیسرائیل ئەوەشی خستەڕوو،  سەرجەم دامەزراوە ئەمنییەکانم راسپاردووە، پرسی بارمتەکان بکەنە کاری لە پێشینەیان، ئەمە ئەو سیاسەتەیە پشتیوانیی دەکەم، ئامانجمە لەم پرۆسەیەدا بەرەوپێشچوون هەبێت، بەدڵنیاییەوە لەگەڵ گشت ئەوانەی لە پرۆسەکە بەشدارن، هەڵسەنگاندنمان کردووە و دەرفەتێکمان لە پێشدایە، دەبێت حەماس نەرمتر مامەڵە بکات.

ئەمەش لە کاتێکدایە، ئەو پێشنیازەی جۆو بایدن بۆئاگربەستی غەززە کردوویەتی لە سێ قۆناغ پێکهاتووە،

لە قۆناغی یەکەم، شەش هەفتە ئاگربەست رادەگەیەنرێت، سوپای ئیسرائیل لەو ناوچانەی دانیشتووان و خەڵکی مەدەنی تێدایە بکشێتەوە، ژمارەیەک بارمتە ئازاد بکرێن و هاوکاری مرۆیی زیاتریش بگەیەنرێتە غەززە،

لە قۆناغی دووەمیشدا، هەموو ئەو بارمتانەی ماون، ئازاد بکرێن، سوپای ئیسرائیل بکشێنەوە و ئاگربەستی هەتا هەتایی ڕاگەیەنرێت.

لە قۆناغی سێیەمیش، دەست بە بنیاتنانەوەی غەززە بکرێت.

ئەم بەرەوپێشچوونەش لە کاتێکدایە، حەماس بۆ یەکەمجار بە داواکارییەکی ئیسرائیل ڕازی بووە و سەرەڕای ئاگربەست سوپای ئیسرائیل لە غەززە دەمێنێتەوە.