AM:11:12:13/12/2024
2224 جار خوێندراوەتەوە
بڕیارە سبەى لەسەر دۆخى سوریا کۆبونەوەیەکی وڵاتانی عەرەبی و نێودەوڵەتی لە ئوردن بەڕێوەبچێت.
ئەمڕۆ هەینی ١٣ـی ١٢ـی ٢٠٢٤، وەزارەتى دەرەوەى ئوردن بڵاویکردوەتەوە، کۆبونەوەکە بۆ تاوتوێکردنی پێشهاتەکانی دۆخی سوریا لە عەقبەی ئوردن بەڕێوەبچێت و وەزیرانی دەرەوە و لیژنەی پەیوەندی وەزیرانی عەرەبی بەشدار دەبن.
لیژنەی پەیوەندیی وەزیرانی عەرەبی سەبارەت بە سوریا بریتین لە ئوردن،
سعودییە، عێراق، لوبنان، میسر، و سکرتێری گشتیی کۆمکاری دەوڵەتانی عەرەبی، وەزیرانی
دەرەوەی ئیمارات، قەتەر و بەحرەین، سەرۆکی ئێستای لوتکەی عەرەبی.
هاوکات، لە کۆبونەوەکەدا هەریەکە لە وەزیرانی دەرەوەی تورکیا، ئەمریکا
و نوێنەرانی یەکێتی ئەوروپا و نەتەوە یەکگرتوەکان بەشداری دەکەن و باس لە دۆزینەوەی
ڕێگایەک بۆ دەستپێکردنی پرۆسەیەکی سیاسی لە سوریا بە گوێرەی بریارنامەی دوو هەزار و ٢٥٤ـی ئەنجومەنی ئاسایش دەکرێت، کە
تیایدا بونیاتنانەوەی سوریایەکی یەکپارچە کە تێیدا مافی هاوڵاتیانی لەبەرچاو بگیرێت
بەشێک لە تەوەری کۆبونەوەکان دەبێت.
