سەردێڕ:

ئەمریکا ژمارەی کڵاوە ئەتۆمییەکانی ئاشکراکرد

PM:01:57:06/10/2021

4988 جار خوێندراوەتەوە

وەزارەتی دەرەوەی ئەمریکا رایگەیاند، تا ئەیلولی ٢٠٢٠ وڵاتەکەی سێ هەزار و ٧٥٠ کڵاوەی ئەتۆمی هەبووە، بەمەش بەراورد بە ساڵی ١٩٦٧ بە رێژەی ٨٨٪ کڵاوە ئەتۆمییەکانی کەمکردووەتەوە.


وەزارەتی دەرەوەی ئەمریکا لە راگەیەنراوێکدا رایگەیاند، تا مانگی ئەیلولی ٢٠٢٠ وڵاتەکەی سێ هەزار و ٧٥٩ کڵاوەی ئەتۆمی هەبووە.

ئاماژەی بەوەشداوە، ئەمەش بەراورد بە ساڵی ١٩٦٧ و سەرەتای جەنگی ساردی نێوان ئەمریکا و روسیا بە رێژەی ٨٨٪ کڵاوە ئەتۆمییەکانی کەمکردووەتەوە، لەکاتێکدا لەو کاتەدا ٣١ هەزار و ٢٥٥ کڵاوەی ئەتۆمی هەبوو.

بەگوێرەی راگەیەنراوەکە، بەمەش بە بەراورد بە ساڵی ١٩٨٩، کە دیواری بەرلینی تێدا روخێنرا، ئەمریکا بەڕێژەی ٨٣٪ کڵاوە ئەتۆمییەکانی کەمکردووەتەوە، چونکە ئەوکاتە ٢٢ هەزار و ٢١٧ کڵاوەی ئەتۆمی هەبووە.

لە ماوەی رابردوودا، ئەمریکا ١١ هەزار و ٦٨٣ کڵاوەی ئەتۆمی خۆی لەناوبردووە و هەڵیوەشاندووەتەوە.

ئاماژەی بەوەشداوە، لە ئێستادا نزیکەی دوو هەزار کڵاوەی دیکەی ئەتۆمی لە چوارچێوەی خزمەتگوزاری و بەرگری سەربازی کشاندووەتەوە و بڕیارە ئەوانەش هەڵبوەشێنێتەوە.

لە مانگی ئەیلولی ١٩٩١، بە ماوەیەکی کەم لە هەڵوەشاندنەوەی یەکێتی سۆڤییەت، ئەمریکا کڵاوە و چەکە ئەتۆمییە نا ستراتیژییەکانی بە رێژەی زیاتر لە ٩٠٪ کەمکردەوە.

لە مانگی کانونی دووەمی ٢٠٢١، پەیمانگای ستۆکهۆڵمی نێودەوڵەتی بۆ توێژینەوەکان لەبارەی ئاشتییەوە ئاماری کڵاوە ئەتۆمییەکانی وڵاتانی جیهانی بڵاوکردەوە و تیایدا هاتبوو، ئەمریکا پێنج هەزار و ٥٥٠ کڵاوە و روسیا شەش هەزار و ٢٥٥ کڵاوە و چین ٣٥٠ کڵاوە و بەریتانیا ٢٢٥ کڵاوە و فەڕەنسا ٢٩٠ کڵاوەی ئەتۆمییان هەیە، هەریەک لە هیندستان و پاکستان و ئیسرائیل و کۆریای باکور، سەرجەمیان ٤٦٠ کڵاوەی ئەتۆمییان هەیە.

ئەمە لەکاتێکدایە، دۆناڵد ترەمپ سەرۆکی پێشووی ئەمریکا لەماوەی چوار ساڵی سەرۆکایەتیدا، سەرجەم زانیاری و ژمارەی کڵاوە ئەتۆمییەکانی بۆ جیهان ئاشکرا نەکرد و لە رێککەوتنی سنوردارکردنی چەکی ئەتۆمی نێوان ئەمریکا- روسیا تاک لایەنانە کشایەوە.

كـ. ئـ








گەلەری