هەر بەپێی ئەو زانیاریانە پارتی بڕی ١٠٠ ملیۆن دۆلار دەداتە بافڵ تاڵەبانی لە بری دەستبەرداربوونی یەکێتی لەو پۆستەدا و ئەو مانگانەیەی کە ئێستا قوباد تاڵەبانی لە بری داهاتی نەوت لە پارتی وەردەگرێت کە بڕەکەی مانگانە ٢٠ ملیۆن دۆلارە، پارتی کردوویەتى بە مانگانەی ٣٠ ملیۆن دۆلار، ئەمەش وەک قەرەبووی ئەو زیانەی کە یەکێتی بەری دەکەوێت لە بەرامبەر دەستبەرداربوون لە پۆستی سەرۆک کۆماردا.

بافڵ تاڵەبانی بەڵێنی ئەوەی داوە هەموو کێشەکانی ناو یەکێتی چارەسەر دەکات و هەموو باڵ و رایە جیاوازەکانی ناو حزبەکەى رازی دەکات بەم رێککەوتنە.

پارتی یەکێتی ئاگادار کردوەتەوە کە دەنگ و کورسی یەکێتی هەرچی بێت و تەنانەت ئەگەر یەکێتی ببێتە هێزی سێیەمیش لە هەرێمی کوردستان ئەوا ئەوان پابەندن بەو رێککەوتنە بە هەموو بڕگەکانیەوە، هەروەها بە یەکێتییان راگەیاندووە ئەگەر ئێستا رازی نەبن، ئەوا دوای هەڵبژاردن بەپێی ئیستیحقاقی هەڵبژاردن مامەڵەیان لەگەڵ دەکەن.

بۆیە هاوسەرۆکی یەکێتی رازی بووە کە دەستبەرداری پۆستی سەرۆک کۆمار بن لە بەرژەوەندی پارتی، کە تا ئێستا هۆشیار زێباری کاندیدی بەهێزی پارتییە.

لە خولی پێشوو و ساڵی ٢٠١٨ پارتی ئەو کات بە فڕۆکەیەک بری ٩٠ ملیۆن دۆلاری برد بۆ بافڵ تاڵەبانی لە بەغدا و لە دوایین ساتەکاندا خەریک بوو پۆستی سەرۆک کۆمار بۆ کاندیدی پارتی (فوئاد حسێن) بێت، بەڵام ئەو کات بەشێک لە یەکێتی رازینەبوون و خودی بەرهەم ساڵحیش فشاری زۆری کردە سەر بافڵ تاڵەبانی، کە لەوکاتەدا بەڵێنی سەرۆک کۆماریان پێدابوو تا واز لە حزبەکەی خۆی بهێنێت و بگەڕێتەوە ناو یەکێتی.

پۆستی سەرۆک کۆمار جگە لەوەی ساڵانە نزیکی سەدان ملیۆن دۆلار نەسریە و بودجەی لەبەردەستایە، بەڵام لە چەند ساڵی رابردوودا وەک سەرچاوەی دەستکەوت و پارە وابووە بۆ یەکێتی و جگە لەو موچە و نەسریەی سەرۆک کۆمار، دەیان پرۆژەی بازرگانی گەورەیان لە بەغدا و شارەکانی تری عێراق پێوەرگرتووە بۆ کۆمپانیاکانی یەکێتی.

هەموو ئەو دەستکەوتە ماددیانەی لە رابردوودا پارتی و یەکێتی لە پۆستەکانی بەغدا دەستیان کەوتووە لەسەر حسابی ئەوە بووە کە دەبوو ئەم پۆستە بەکاربهێنریت بۆ گەڕاندنەوەی ناوچە جێناکۆکەکان و دانانی پارێزگارێکی کورد بۆ کەرکوک و هەروەها زیادکردنی موچەی پێشمەرگە و دۆسیەی تری گرنگ تایبەت بە خەلکی هەرێمی کوردستان، کە پارتی و یەکێتی جگە لە دەستکەوت بۆ کۆمپانیاکانیان، هیچ کام لەوانەیان نەکردوە.