بەپێی راپۆرتێکی ئێن ئاڕ تی، خوێندنگا و نەخۆشخانە حکومییەکان دەوامیان تێدا ناکرێت و خوێندنگا و نەخۆشخانە ئەهلییەکانیش دەوام دەکەن، هاوڵاتیانیش دەڵێن، "حکومەتى کاربەڕێکەر بەمەبەست کەرتى گشتى پشتگوێ خستووە".
ئەمڕۆ هەینی، بەپێی بەدواداچوونەکانی ئێن ئاڕ تی، دەسەڵات بە مەبەست کەرتى حکومەتى پشتگوێخستووە و بەرامبەر بەوە کەرتى تایبەت کە خۆیان خاوەندارێتى دەکەن، بەهێز دەکەن. لەوبارەیەشەوە هاوڵاتیان دەڵێن، " حکومەتی کاربەڕێکەر لەسەر گیرفانمان، گیرفانى خۆیان پڕتر دەکەن".
هاوکات،
پزیشکانى خولاو دەوامیان راگرتووە و داوای وەرگرتنی مووچەکانیان دەکەن، دەشڵێن،
" حکومەتى کاربەرێکەر بەمەبەست کەرتى تەندروستى گشتى پشتگوێخستووە، بۆ ئەوەى
هاوڵاتیان روو لە نەخۆشخانە ئەهلییەکان بکەن، لەکاتێکدا زۆربەى ئەو نەخۆشخانانەش لەلایەن
بەرپرسانى یەکێتى و پارتییەوە خاوەندارێتى دەکرێن".
لەلایەکی
دیکەوە، کەرتى تایبەت لە بوارەکانى تەندروستى و پەروەردە دەوامى ئاسایی دەکەن و دەسەڵات بە
پشتگوێخستنی کەرتی گشتی مەبەستیەتی خەڵک لەو کەرتە بتەکێنێتەوە و بیانخاتەسەر
کەرتى تایبەت، ئەوەش بۆ ئەوەی گیرفانى حزبەکانى دەسەڵات پڕتر بکات.
ئەوەش
لەکاتێکدایە، نزیکەى دوو مانگە مامۆستایان و وانەبێژان لە ناوچە جیاوازەکانی هەرێم
لە خۆپیشاندان و ناڕەزایەتى دەربڕین بەردەوامن و داواى دامەزراندن و دابەشکردنى شایستە
داراییەکانیان دەکەن، بەڵام تا ئێستا حکومەتی کاربەڕێکەر هیچ وەڵامێکی نەداونەتەوە.