ئاماری قوربانییەکان

بەپێی زانیاریییەکانی ئێن ئاڕ تی، تاوەکو ئێستا بە هۆی ئەو ئاگرەوە ١٢٠ کەس گیانیان لەدەستداوە و نزیکەی ٥٠٠ کەسیش بریندارن کە بەشێکیان برینەکانیان سەختە و مەترسی لەسەر ژیانیان هەیە.

هاوکات زیاد لە ٦٠ کەس لە بریندارەکان گەیەندراونەتە نەخۆشخانەی هەولێر، کە بەشێکیان برینەکانیان سوکە و نزیکەی ٣٠ کەسیان برینەکانیان سەختە و ١٥ کەسیان بە رێژەی ٦٠٪ تا ٩٠٪ی جەستەیان سوتاوە، دوو لەو بریندارانەش مەترسی لەسەر ژیانیان هەیە.

هۆکارەکانی ئاگرەکە و قوربانییەکان

نەجم جبوری، پارێزگاری نەینەوا رایگەیاند، بە پێی لێکۆڵینەوە سەرەتاییەکان هۆکاری ئاگرەکە بۆ پێشێلکردنی رێساکانی سەلامەتی دەگەڕێتەوە کە هۆکاری سەرەکی بەکارهێنانی یاریە ئاگرینەکان بووە لە هۆڵی ئاهەنگەکەدا.

هاوکات بەڕێوەبەری راگەیاندنی بەرگری شارستانی عێراق ئاماژەی بەوەکرد، ئەو هۆڵەی ئاهەنگەکەی تێدا ئەنجامدراوە رێ و شوێنی سەلامەتی سیستەمی ئاگر کوژێنەوەی تێدا نەبووە و تەنها یەک دەرگای بچوکی هەبووە، کە سەختی دەرچوون لەو دەرگایەوە قوربانیەکی زۆری لێکەوتوەتەوە.

ئەوەشی خستەڕوو، ئاگرەکە بووەتە هۆی داڕمانی بەشەکانی هۆڵەکە چونکە ئەو کەرەستە بیناسازییانەی لەو هۆڵەدا بەکارهاتبوون بە خێرایی گڕ دەگرن و دەبنە هۆی ڕوخانی شوێنەکە، هاوکات، پێشتریش بەرگری شارستانی خاوەنی هۆڵەکەی لەو سەرپێچیانە ئاگادار کردبوەوە کە دەبێت لاببرێن، هەربۆیە خاوەنی هۆڵەکە دەستگیرکراوە و لێکۆڵینەوەی لەگەڵدا دەکرێت.

بڕیار و هەڵوێستی لایەنە پەیوەندیدارەکان

محەمەد شیاع سودانی سەرۆک وەزیرانی عێراق، بەهۆی ڕووداوەکەوە سێ رۆژ ماتەمینی لە سەرتاسەری عێراق راگەیاند، وەزیرانی ناوخۆ و تەندروستیشی ڕاسپاردووە تا هەوڵەکانیان بۆ رزگارکردنی بریندارەکان چڕتر بکەن.

وتیشی، پێویستە لیژنەیەکی لێکۆڵینەوە پێکبهێنرێت دەستبەجێ دەست بە بەدواداچوون بۆ ئاشکراکردنی بارودۆخی ڕووداوەکە بکات، بۆ دیاریکردنی هۆکارەکان و ئاشکراکردنی ئەو کەسانەی کەمتەرخەمبوون.

هاوکات، فەرماندەی ئۆپراسیۆنەکانی نەینەوا رایگەیاند، ١٤ کەس لە خاوەن و سەرپەرشتیار و کارمەندانی ئەو هۆڵەی ئاگرەکەی تێدا کەوتەوە دەستگیرکراون بە تۆمەتی کەمتەرخەمی.