بەپێی دەقی یاسایەک، لە چین بەکارهێنانی ئینتەرنێت بۆ تەمەنی خوار ١٨ساڵان لە کاتەکانی شەودا قەدەغە دەکرێت و لە کاتەکانی رۆژیشدا سنورداری دەکات.
ئەمڕۆ شەممە، وڵاتی چین رایگەیاند، دەقی یاسایەکیان ئامادەیە کە رێگری لە کەسانی خوار تەمەن ١٨ ساڵ دەکات لە شەودا ئینتەرنێت بەکاربهێنن و لە کاتەکانی رۆژیشدا بەکارهێنانی ئینتەرنێتیان بۆ سنوردار دەکات.
بەگوێرەی بڵاوکراوەکە،
پڕۆژەیاساکە لەمانگی ئەیلولی داهاتوودا دەچێتە بواری جێبەجێ کردنەوە و بەگوێرەی پڕۆژەیاساکە
لە کاتژمێر ١٠ی شەو بۆ شەشی بەیانی کەسانی تەمەن خوار ١٨ ساڵ ناتوانن ئینتەرنێت بەکاربهێنن.
لە پڕۆژەیاساکەدا،
رێژەی بەکارهێنانی ئینتەرنێت لە رۆژدا بەپێی تەمەنەکان جیا کراوەتەوە و ئەو کەسانەی
تەمەنیان لە ١٦ ساڵ و ١٧ ساڵدایە دەتوانن دوو کاتژمێر ئینتەرنێت بەکاربهێنن و ئەوانەشی
لە هەشت ساڵ کەمترە تەمەنیان دەتوانن ٤٠ خولەک ئینتەرنێت بەکاربهێنن.
ئەوە لە کاتێکدایە،
ماوەی چەند ساڵێکە وڵاتی چین بەنیازى جێبەجێ کردنى ئەو یاسایەیە و لە ساڵی ٢٠٢١یش
کاتی یاری کردنە ئەلیکترۆنیەکانی بۆ منداڵان سنووردار کرد، ئەمەش ناڕەزایى و
نیگەرانى کۆمپانیاکانى بوارى گەیمینى لێکەوتەوە.