مێتا باسی لەوەکردووە، کۆمپانیای کامبریدج ئەنالیتیکا بۆ راوێژی سیاسی توانیویەتی زانیاری لەسەر ٨٧ ملیۆن بەکارهێنەری فەیسبووک کۆبکاتەوە و مێتاش داوای یاسایی لەسەر ئەو کۆمپانیایە تۆمار کردووە.

ساڵی رابردوو مێتا بڕیاریدا ٧٢٥ ملیۆن دۆلار وەک قەرەبوو بۆ ئەو بەکارهێنەرانە دابین بکات و لەمساڵیشدا قەرەبووەکە دەداتە بەکارهێنەرەکان.

بەپێی ئاژانسی هەواڵی سی ئێن بی سی، تاکو مانگی داهاتوو بەکارهێنەرانی فەیسبووک دەتوانن داوا پێشکەش بکەن بۆ وەرگرتنی قەرەبووەکانیان وپێویستە ئەو کەسەی داواکاری پێشکەش دەکات هەژمارێکی کارای فەیسبووکی لەنێوان ساڵی ٢٠٠٧ بۆ ٢٠٢٢دا هەبوو بێت.

مەرجێکی دیکەی پێشکەش کردنی داواکاری بۆ وەرگرتنی قەرەبووەکە ئەوەیە ئەو بەکارهێنەرە لەو ماوەیەدا لە ئەمەریکا ژیابێت، چونکە تەنیا زانیاری ئەو بەکارهێنەرانە دزەیان پێکراوە کە لە ئەمەریکا ژیاون.

ئەمەش دوای ئەوەدێت، لە ساڵی ٢٠١٨ کۆمپانیای فەیسبووک کە دواتر ناوەکەی بۆ مێتا گۆڕدرا رایگەیاند، کۆمپانیای کامبریدج ئەنالیتیکا بۆ راوێژی سیاسی توانیوییەتی زانیاری لەسەر ٨٧ ملیۆن بەکارهێنەری فەیسبووک کۆبکاتەوە.

کۆمپانیاکە لە ساڵی ٢٠١٦دا یەکێک بوو لە پاڵپشتەکانی دۆناڵد ترامپ سەرۆکی پێشووی ئەمەریکا لە ماوەی بانگەشەی هەڵبژاردنەکانى سەرۆکایەتی دا.